مفتیان کرام کا کام فتویٰ دینا، ریاست کو عالمی صورتحال دیکھنا ہوتی ہے: وزیر مذہبی امور
کراچی (آئی این پی) وفاقی وزیر مذہبی امور سردار محمد یوسف نے کہا ہے وزیراعظم پاکستان بھی فلسطین میں جاری جنگ وجدل کی مذمت کرتے ہیں، مفتیان کرام کی جانب سے فلسطین کے معاملے پر جہاد کا فتوی آیا ہے، ان کا کام فتوی دینا ہے البتہ ریاست کو بین الاقوامی صورتحال کو دیکھنا ہوتا ہے تاکہ کسی عمل سے عالمی امن کو کوئی خطرہ نہ ہو۔ جمعرات کو کر ا چی ایئرپورٹ کے باہر میڈیا سے گفتگو کرتے ہوئے انہوں نے کہا کراچی میں استقبال کرنیوالوں کا شکریہ ادا کرتا ہوں، اپنی وزرات سے متعلق ذمہ داری نبھانے کراچی آیا ہوں، مسلم لیگ ن کی حکومت نے عوام کیلئے اصلاحات کیں جس سے عام افراد کو فائدہ پہنچا۔ان کا کہنا تھا پیپلز پارٹی اور ایم کیو ایم ہمارے اتحادی ہیں، مسلم لیگ کی حکومت نے فیصلہ کیا ہے سب کو ساتھ لے کر چلیں گے، پہلے دیوالیہ ہونے کی بات ہوتی تھی اب معاشی طور پہ پاکستان بہتری کی طرف گامزن ہے، عسکری و سیاسی قیادت مل کر کام کر رہے ہیں۔وفاقی وزیر نے کہا اوور سیز پاکستانیوں نے بھی خوشی کا اظہار کیا ہے، پہلی بار اوور سیز پاکستانیوں کو یہاں مدعو کیا گیا، روڈ ٹو مکہ کے تحت رواں سال بھی کراچی ائیرپورٹ پر عازمین حج کی امیگریشن ہوگی، عازمین حج سعودی ائیر پورٹ پر اتر کر براہ راست اپنی رہائش گاہوں میں منتقل ہونگے، لاہور ائیر پورٹ پر روڈ ٹو مکہ پراجیکٹ کے تحت عازمین حج کی روانگی کیلئے بات چیت چل رہی ہے۔
وزیر مذہبی امور
