نارووال کا جلسہ ٹائیگر صحافی، یو ٹیوبرز،تجزیہ نگاروں کی آنکھیں کھولنے کیلئے کافی ہے: عظمیٰ بخاری
لاہور (ڈیلی پاکستان آن لائن ) وزیر اطلاعات پنجاب عظمیٰ بخاری نے نارووال میں منعقدہ جلسے کی تصویریں شیئر کرتے ہوئے اپنے بیان میں کہا کہ مسلم لیگ (ن) کے جلسے دن کی روشنی میں منعقد ہوتے ہیں، جو ہماری عوامی مقبولیت کا واضح ثبوت ہیں۔جو لوگ جلسے کی تعداد گننا چاہتے ہیں یا قریب سے دیکھنا چاہتے ہیں، وہ شوق سے زوم کر سکتے ہیں۔
انہوں نے مزید کہا کہ وہ نام نہاد 'ٹائیگر صحافیوں' اور 'یوٹیوبرز' کو یاد دلانا چاہتی ہیں کہ جو کل تک مسلم لیگ (ن) کے خاتمے کی پیشگوئی کر رہے تھے، نارووال کے جلسےنے ان کے تمام اندازوں کو غلط ثابت کر دیا ہے۔
وزیر اطلاعات نے مزید کہا کہ وہ ان تجزیہ کاروں کو کیا جواب دیں جو کہتے تھے کہ مسلم لیگ (ن) اب عوام میں نہیں نکل سکتی۔ نارووال کا تاریخی جلسہ ان کے لیے آنکھیں کھولنے کے لیے کافی ہے۔ وہ عناصر جو فساد گروپ کے لیڈر کو مقبول بنانے میں لگے ہوئے ہیں، انہیں حقائق کا سامنا کرنا ہوگا۔ مریم نواز کی ایک سالہ کارکردگی نے تمام بے بنیاد تجزیوں کو غلط ثابت کر دیا ہے اور عوام نے مسلم لیگ (ن) پر اپنے اعتماد کی مہر ثبت کر دی ہے۔
