بیوی سے ناراضی کا بدلہ؛ ظالم باپ نے 4 سالہ بیٹے کی ٹانگ توڑ دی
بھکر(ڈیلی پاکستان آن لائن )بیوی سے ناراضی کا بدلہ لینے کے لئے ظالم باپ نے 4 سالہ بیٹے کی ٹانگ توڑ دی۔
نجی ٹی وی ایکسپریس نیوز کے مطابق بھکر کے نواحی علاقے دلے والا میں سنگ دل باپ جلاد بن گیا اور اپنے ہی حقیقی بیٹے پر ظلم کی انتہا کردی۔ ظالم شخص نے بیوی سے ناراضی کا بدلہ اپنے معصوم بیٹے کی ٹانگ توڑ کر نکالا۔
بے رحم باپ نے تشدد کرتے ہوئے لکڑی کی چھڑی کے وار سے 4 سالہ شاہ زیب کی ٹانگ توڑ دی، تب بھی جلاد باپ کو ترس نہیں آیا جبکہ معصوم بچہ تکلیف سے تڑپتا رہا، جسے زخمی حالت میں ہسپتال منتقل کیا گیا۔
پولیس حکام نے کمسن بچے پر تشدد اور ٹانگ توڑنے کے واقعے پر سخت نوٹس لیتے ہوئے سنگدل باپ کو فوری طور پر گرفتار کرکے حوالات میں بند کردیا۔ پولیس نے بچے کی والدہ کی مدعیت میں مقدمہ درج کرلیا۔
ابتدائی معلومات کے مطابق ملزم شاہ نواز کا اپنی بیوی سے گھریلو تنازع چل رہا تھا اور ملزم کی بیوی ایک سال سے روٹھ کر میکے میں رہ رہی تھی۔ ہسپتال میں بات کرتے ہوئے متاثرہ بچے نے روتے ہوئے بتایا کہ ابو نے سوٹیاں (چھڑی) مار کر میری ٹانگ توڑ دی۔
