18اشیاء سستی، ہفتہ وار مہنگائی میں 0.69فیصد کمی: ادارہ شماریات

                                                                        اسلام آباد(آئی این پی)ملک میں مہنگائی کی شرح میں ہفتہ وار بنیادوں پر 0.69فیصد کی معمولی کمی ریکارڈ کی گئی ۔ادارہ شماریات کی جانب سے جاری کردہ تازہ ہفتہ وار رپورٹ کے مطابق ایک ہفتے میں مہنگائی کی شرح میں 0.69فیصد کی نمایاں کمی ریکارڈ کی گئی جبکہ سالانہ بنیادوں پر مہنگائی کی شرح منفی 2.72فیصد تک آگئی۔رپورٹ کے مطابق گزشتہ ہفتے51بنیادی اشیاء  کا جائزہ لیا گیا، جن میں سے15 اشیاء کی قیمتوں میں اضافہ اور 18 اشیاء سستی ہوئیں جبکہ17اشیا ء کی قیمتوں میں استحکام رہا۔ زندہ مرغی کی قیمت میں فی کلو 55 روپے تک کمی ہوئی اور ٹماٹر فی کلو 16 روپے سے زائد سستے ہوئے جبکہ پیاز فی کلو6 روپے اور لہسن کی قیمت میں 42روپے فی کلو کمی ہوئی۔ آٹے کا 20 کلو تھیلا 40 روپے تک سستا ہوا جبکہ چینی میں فی کلو 49 پیسے کی کمی ہوئی۔ اسکے علاوہ آلو، چاول، گھی، خوردنی تیل اور دال ماش بھی سستی ہونیوالی اشیا ء میں شامل ہیں۔ بیف کی قیمت میں 7روپے فی کلو، مٹن کی قیمت میں 10روپے فی کلو اور جلانے کی لکڑی سمیت دال مونگ اور تازہ دودھ کی قیمتوں میں بھی اضافہ ریکارڈ کیا گیا۔

مہنگائی رپورٹ