لاہور: دوست کو نہر میں پھینک کر قتل کرنیوالے ملزمان 24 گھنٹے میں گرفتار
لاہور (ڈیلی پاکستان آن لائن )صوبہ پنجاب کے دارالحکومت لاہور میں دو دوستوں نے اپنے 18 سالہ نوجوان دوست کو نہر میں پھینک کر قتل کر دیا، شاد باغ پولیس نے 24 گھنٹے میں ملزمان کو گرفتار کر لیا۔
ڈان نیوز کے مطابق تھانہ شاد باغ کے علاقے میں سلیم نامی دوست کو قتل کرنے والے 2 ملزمان منیب اور زبیر کو 24 گھنٹے میں گرفتار کرلیا گیا۔
پولیس حکام کی جانب سے بتایا گیا کہ گزشتہ روز مقتول کی والدہ نے بیٹے کے گھر واپس نہ لوٹنے کے حوالے سے درخواست جمع کرائی تھی، درخواست موصول ہوتے ہی فوراً مقدمہ درج کر کے کارروائی شروع کی گئی۔
شاد باغ پولیس نے مقتول کے دوستوں منیب اور زبیر کو گرفتار کیا، دوران تفتیش ملزمان نے سلیم کو نہر میں پھینکنے کا اقرار کیا۔
سپرنٹنڈنٹ آف پولیس (ایس پی) نے بتایا کہ ریسکیو ٹیم نے لاش کی تلاش کے لئے آپریشن کیا اور مقتول کی میت کو نہر سے نکالا، مقتول سلیم کو دوستوں منیب اور زبیر نے نہر میں پھینک کر قتل کیا تھا۔
ایس پی سٹی کیپٹن ریٹائرڈ قاضی علی نے بتایا کہ ملزمان نے واقعے کو چھپانے کے لئے مقتول کے شاگرد کو بھی ہراساں کیا، افسوس ناک واقعے میں ملوث ملزمان کو گرفتار کر کے مزید قانونی کارروائی کی جا رہی ہے۔
