ایک کروڑ نوکریوں کا جھانسہ دینے والے روزگار چھیننے پر آگئے ہیں: عظمیٰ بخاری
لاہور ( ڈیلی پاکستان آن لائن ) وزیراطلاعات پنجاب عظمیٰ بخاری نے کہا ہے کہ ایک کروڑ نوکریوں کا جھانسہ دینے والے لوگوں کے روزگار چھیننے پر آگئے ہیں۔
تفصیلات کے مطابق وزیر اطلاعات پنجاب عظمیٰ بخاری نے کہا ہے کہ خیبرپختونخواحکومت نے مرکز بحالی پروجیکٹ کے 182 ملازمین کو ایک ہی دن میں نوکری سے برطرف کر دیا۔کے پی حکومت کا محکمہ اطلاعات سوشل میڈیا برگیڈ کو کروڑوں روپے فراہم کرتا ہے، جو دن رات پاکستان اور قومی سلامتی کے اداروں کے خلاف پروپیگنڈہ کرتا ہے۔ دوسری جانب سرکاری ملازمین کی تنخواہوں کی ادائیگی کے لیے ان کے پاس فنڈز نہیں ہوتے۔
عظمیٰ بخاری نے کہا کہ کے پی حکومت کے پاس احتجاج، جلسے اور مارچ پر خرچ کرنے کے لیے ہمیشہ وسائل دستیاب ہوتے ہیں، جبکہ بلدیاتی نمائندے 2سال سے فنڈز نہ ملنے پر سڑکوں پر احتجاج کر رہے ہیں اور تعلیمی اداروں کے ملازمین بھی شدید پریشانی کا شکار ہیں۔ پنجاب میں وزیر اعلیٰ مریم نواز نے صرف ستھرا پنجاب منصوبے کے تحت 1 لاکھ سے زائد نوکریاں فراہم کی ہیں، جبکہ درجنوں دیگر منصوبوں میں لاکھوں نئی ملازمتیں پیدا ہوئی ہیں۔
عظمیٰ بخاری نے کہا کہ مریم نواز عوام کی خدمت میں مصروف ہیں، جبکہ مخالفین عوام کے منہ سے روٹی کا نوالہ چھیننے میں لگے ہوئے ہیں۔
