پہلگام حملہ ، اپوزیشن کی مودی سرکار پر"سوالات کی بوچھاڑ"، دلی میں آل پارٹیز کانفرنس کی اندرونی کہانی سامنے آ گئی

نئی دلی ( مانیٹرنگ ڈیسک ) پہلگام حملے کے حوالےسے ، دلی میں  ہونیوالی آل پارٹیز کانفرنس کی اندرونی کہانی سامنے آ گئی ۔ 

تفصیلات کے مطابق   بھارتی اپوزیشن نے مودی سرکار پر"سوالات کی بوچھاڑ" کر دی ۔بھارتی حکومت نے پہلگام حملے میں انٹیلی جنس ناکامی کا اعتراف کرلیا۔

"جیو نیوز " کے مطابق دلی میں آل پارٹیز کانفرنس میں اپوزیشن نے ناقص سیکیورٹی پر حکومت کو آڑے ہاتھوں لیا۔ کانگریس رہنما راہول گاندھی نے کہا کہ آخر پہلگام میں سیکیورٹی کیوں نہیں تھی۔ 

وزیر داخلہ امیت شاہ ماننے پر مجبور ہوگئے کہ پہلگام واقعہ سیکیورٹی اور انٹیلی جنس کی ناکامی ہے۔

کانگریس نے پہلگام حملے میں انٹیلی جنس ناکامی کی بھرپور تحقیقات کا مطالبہ کیا۔

آل پارٹیز کانفرنس بھارتی وزیر دفاع راج ناتھ سنگھ کی زیرصدارت ہوئی، جس میں آل انڈیا اتحاد المسلمین کے اسدالدین اویسی بھی شریک ہوئے۔

اسد الدین اویسی نے سوال اٹھایا کہ سندھ طاس معاہدہ معطل کرکے دریا کا رخ موڑ کر بھارت اتنا پانی رکھے گا کہاں؟

 جواب دیا گیا کہ اس کا انتظام کیا جائے گا۔

خیال رہے کہ مقبوضہ کشمیر کے علاقے پہلگام میں ہونے والے حملے میں 26 سیاح ہلاک ہوئے ، بھارت نے پاکستان کے خلاف سخت اقدامات کا اعلان کرتے ہوئے واہگہ اٹاری سرحد بند کر دی ،سندھ طاس معاہدہ یک طرفہ طور پر معطل کر دیا  جبکہ پاکستانیوں کے بھارتی ویزے منسوخ اور بھارت میں موجود پاکستانی شہریوں کو 48 گھنٹوں میں ملک چھوڑنے کا حکم بھی دیا۔