طلباء و طالبات کے لیے خوشخبری،وزیراعظم یوتھ لیپ ٹاپ سکیم کی رجسٹریشن کا آغاز ہوگیا

 اسلام آباد(آئی این پی ) حکومت نے طلباء و طالبات کے لیے خوشخبری سناتے ہوئے "وزیراعظم یوتھ لیپ ٹاپ سکیم" کے تحت لیپ ٹاپس کی فراہمی کے لیے رجسٹریشن کا آغاز کر دیا۔ یہ سکیم ملک بھر کے ذہین اور محنتی طلبا و طالبات کو تعلیمی سرگرمیوں میں سہولت فراہم کرنے کے لیے متعارف کروائی گئی ہے۔
تفصیل کے مطابق چیئرمین وزیراعظم یوتھ پروگرام رانا مشہود احمد خاں نے اعلان کیا ہے کہ اس سکیم کے تحت وفاقی سطح پر  1 لاکھ لیپ ٹاپس میرٹ کی بنیاد پر فراہم کیے جائیں گے۔ انہوں نے طلباء کو ہدایت کی کہ وہ بروقت رجسٹریشن کروائیں تاکہ کسی قسم کی دشواری یا محرومی سے بچا جا سکے۔ لیپ ٹاپ کے لیے رجسٹریشن کی آخری تاریخ 20 مئی 2025 مقرر کی گئی ہے۔ رجسٹریشن وزیراعظم ڈیجیٹل یوتھ ہب کے ذریعے کی جائے گی، جو کہ ایک آن لائن پلیٹ فارم ہے۔ 
اس ویب سائٹ پر پاکستان کے تمام پبلک سیکٹر ہائیر ایجوکیشن انسٹی ٹیوٹس میں زیرِ تعلیم طلبا و طالبات رجسٹریشن کے اہل ہوں گے۔ اس اقدام کا مقصد تعلیمی ترقی کو فروغ دینا اور طلبا ءکو ٹیکنالوجی سے جوڑنا ہے تاکہ وہ جدید تعلیم کے تقاضوں پر پورا اتر سکیں۔انہوں نے اس بات پر خوشی کا اظہار کیا کہ سکیم کی رجسٹریشن کا آغاز ہو چکا ہے اور بہت جلد ملک بھر کے طلباء و طالبات اس سکیم سے مستفید ہو سکیں گے۔ اس اقدام کو تعلیمی شعبے میں ایک مثبت پیشرفت قرار دیا جا رہا ہے، جو نوجوان نسل کو با اختیار بنانے کی حکومتی کوششوں کا حصہ ہے۔