پنسل سے بھی پتلا، آئی فون 17 کی نئی ویڈیو لیک ہوگئی
واشنگٹن (ڈیلی پاکستان آن لائن )معروف ٹیکنالوجی کمپنی ایپل کی جانب سے آئی فون 16 سیریز کو ستمبر 2024 میں متعارف کرایا گیا تھا جبکہ نئے ماڈلز کو پیش کرنے میں ابھی کافی وقت ہے۔
نجی ٹی وی جیو نیوز کے مطابق آئی فون 17 سیریز کے حوالے سے لیکس کا سلسلہ جاری ہے اور اب 2025 کے آئی فون کے ماڈل کی جھلک کی ایک ویڈیو یوٹیوب پر سامنے آئی ہے۔
یوٹیوب پر Unbox Therapy نامی چینل پر نئے آئی فون کی ویڈیو شیئر کی گئی ہے،چینل کے میزبان لیوس جارج نے چین میں نئے آئی فونز کے مینوفیکچررز ڈمی ماڈلز پر نظر ڈالتے ہوئے آئی فون 17 کے ماڈل کی ایک جھلک دکھائی ہے۔
اس ویڈیو کے مطابق آئی فون کا آئندہ ماڈل توقع سے بھی زیادہ اور اب تک کا سب سے زیادہ پتلا فون ہو سکتا ہے۔
ویڈیو میں کئے گئے دعوے کے مطابق آئی فون کی موٹائی 5.65mm یعنی پنسل سے پتلی ہوسکتی ہے، اگر دعویٰ درست ہوا تو یہ فون ایپل کا اب تک کا سب سے باریک سمارٹ فون بن جائے گا۔
خیال رہے کہ اس سے قبل آئی فون 17 کیلئے ایکس (ٹوئٹر) پر ایک پوسٹ میں ایک پروٹوٹائپ ڈیزائن کو شیئر کرتے ہوئے عندیہ دیا گیا تھا کہ آئی فون 17 سابقہ ماڈلز سے مختلف ہوگا۔
بتایا گیا تھا کہ نئے آئی فونز میں ڈائنامک آئی لینڈ کے حجم کو کم کیا جائے گا، یہ نیا فون ایپل کا اب تک کا سب سے پتلا آئی فون ہوگا۔
9 ٹو 5 میک کی ایک رپورٹ کے مطابق آئی فون 17 ایئر ایپل کے آئی فون پرو ماڈلز کے مقابلے میں 25 فیصد پتلا ہوگا۔
