پاکستان عالمی فوج کو سب سے زیادہ دستے فراہم کرنے والے ممالک میں شامل
راولپنڈی (ویب ڈیسک) پاکستان اقوام متحدہ کو سب سے زیادہ فوجی دستے فراہم کرنے والے ملکوں میں شامل ہے‘ امن کے قیام کے لئے پاکستانی فورسز کی پیشہ وارانہ خدمات کو دنیا تسلیم کرتی ہے‘ پاک فوج نے اقوام متحدہ کے 43امن مشن آپریشنز میں شرکت کی‘اس کے دوران پاکستان کے 153 جوانوں نے جانوں کی قربانی دی‘ پاک فوج کے چھ ہزار سے زائد افسر‘ جوان امن مشنز میں خدمات سرانجام دے رہے ہیں۔
منگل کو پاک فوج کے شعبہ تعلقات عامہ آئی ایس پی آر کے مطابق اقوام متحدہ امن مشن میں پاک فوج کی خدمات کی طویل تاریخ ہے پاکستان نے 1960ءمیں شروع کئے گئے امن مشن آپریشن کی حمایت کی۔ پاکستان نے کانگو میں امن آپریشن میں اپنا پہلا دستہ بھجوایا تھا۔ امن مشنز کے دوران پاکستان کے 153 جوانوں نے جانوں کی قربانی دی۔ اقوام متحدہ کے عالمی امن و استحکام مشنز میں پاک فوج کے 23افراد بھی شہید ہوئے۔
پاک فوج کے چھ ہزار سے زائد افسر‘ جوان امن مشنز میں خدمات انجام دے رہے ہیں۔ پاکستان اقوام متحدہ کو سب سے زیادہ فوجی دستے فراہم کرنے والے ملکوں میں شامل ہے۔ پاکستان کئی برسوں سے اقوام متحدہ کو فوجی دستے فراہم کررہا ہے، امن کے قیام کے لئے پاکستانی فورسز کی پیشہ وارانہ خدمات کو دنیا تسلیم کرتی ہے۔
