پنجاب حکومت نے بلٹ ٹرین اور ایئر لائن چلانے کا اعلان کردیا،4 طیارے لیز پر لیں گے: عظمی بخاری
لاہور (ڈیلی پاکستان آن لائن ) پنجاب حکومت نے صوبے کی پہلی ایئر لائن اور بلٹ ٹرین چلانے کا اعلان کردیا۔وزیر اطلاعات پنجاب عظمی بخاری کا کہنا ہے کہ لاہورسے راولپنڈی تک بلڈ ٹرین چلائی جائے گی، پنجاب کی پہلی ایئر لائن کیلئے 4 طیارے لیز پر لیں گے۔
ڈی جی پی آر میں پریس کانفرنس سے خطاب کرتے ہوئے وزیر اطلاعات و ثقافت پنجاب عظمیٰ بخاری نے کہا ہے مودی ایک عالمی دہشت گرد ہے، وہ جب اقتدار میں آتا ہے دنیا میں حالات خراب ہوتے ہیں۔ سندھ طاس معاہدہ چائے کا ٹھیلہ یا پکوڑے کی دکان نہیں جسے مودی اپنی مرضی سے بند کر سکیں.پہلگام واقعہ سے پاکستان کا کوئی تعلق نہیں، بغیر تحقیق کے الزامات سوچے سمجھے منصوبے کا حصہ ہیں۔بھارتی سرکار کے خوف کا یہ عالم ہے کہ حکومت پاکستان کا ایکس اکاؤنٹ ہی بند کر دیا۔ مقبوضہ کشمیر کے علاقے پہلگام میں پیش آنے والے افسوسناک واقعے میں بے گناہ شہریوں کی ہلاکت پر پاکستانی قیادت نے نہ صرف افسوس کا اظہار کیا بلکہ اس واقعے کی شدید مذمت بھی کی ہے۔ انہوں نے کہا کہ افسوس کا مقام ہے کہ بغیر کسی تحقیق کے پاکستان پر الزامات عائد کیے جا رہے ہیں، حالانکہ پاکستان کا اس واقعے سے کوئی تعلق نہیں۔
عظمیٰ بخاری نے یاد دلایا کہ جب پاکستان میں جعفر ایکسپریس پر حملہ ہوا تھا اور دہشت گردوں کے خلاف پاک افواج نے کامیاب کارروائی کر کے یرغمالیوں کو بازیاب کرایا تھا، تب بھارت نے نہ مذمت کی اور نہ ہی ذمہ داری کا مظاہرہ کیا تھا۔ پہلگام واقعے میں بھارت نے ڈرامائی انداز اپنایا اور بغیر کسی تحقیق کے پاکستان پر الزام لگا کر اپنی پرانی روش کو دہرایا۔ بھارتی فوج اور خفیہ ادارے الزام تراشی کی عادت سے مجبور ہیں اور اس مرتبہ بھی سوچے سمجھے منصوبے کے تحت پاکستان کو بدنام کرنے کی کوشش کی گئی ہے۔
وزیر اطلاعات نے کہا کہ چند منٹوں میں مقدمہ درج کر دینا اور کئی کلومیٹر دور سے فائرنگ کے بعد پاکستان پر الزام لگانا مضحکہ خیز ہے۔ کشمیر کی جنت نظیر وادی میں کشمیریوں کے کاروبار کو تباہ کرنے اور پاکستان کے خلاف عالمی سطح پر پروپیگنڈا کرنے کی گھناؤنی سازش کی گئی ہے۔ بھارت کا خوف اس حد تک بڑھ چکا ہے کہ حکومت پاکستان کا ایکس اکاؤنٹ بند کروا دیا گیا ہے۔ اگر بیرونی سرپرستی یا سرحد پار سے حملے کی بات کی جا رہی ہے تو ہمارے پاس تو جعفر ایکسپریس کے ثبوت موجود ہیں۔ پاکستانی فوجی جوان جذبہ شہادت سے سرشار ہو کر وردی پہنتے ہیں، جبکہ بھارتی افواج بھوک اور خوف کا شکار ہیں۔پاکستانی قوم بھارتی دھمکیوں کا مذاق اڑا رہی ہے اور اگر ریاست نے جہاد کا اعلان کیا تو پوری قوم سپاہی بن کر میدان میں اترے گی۔ انہوں نے یاد دلایا کہ بھارت نے جب 5ایٹمی دھماکے کیے تو پاکستان نے چھ دھماکے کر کے جواب دیا تھا۔
عظمیٰ بخاری نے کہا کہ بھارت نے واہگہ بارڈر بند کر کے خود ہی اپنی تجارت کو نقصان پہنچایا ہے اور اب پہلگام واقعہ کے بعد اپنی ناکامیوں پر پردہ ڈالنے کے لیے پاکستان پر الزامات لگا رہا ہے۔ آزاد کشمیر میں بھارتی جارحیت کے نتیجے میں دو گھروں کو بم دھماکے سے اڑایا گیا ہے، مگر بھارتی فوج کے سابق افسران خود اعتراف کرتے ہیں کہ بھارت پاکستان سے لڑنے کی صلاحیت نہیں رکھتا۔ جنگیں ہتھیاروں سے نہیں جذبہ شہادت سے جیتی جاتی ہیں۔ پاکستان ایک ایٹمی قوت ہے اور ہمیں اپنے عظیم قائدین ذوالفقار علی بھٹو شہید اور نواز شریف کو یاد رکھنا چاہیے جنہوں نے پاکستان کو ناقابل تسخیر دفاع فراہم کیا۔ ہم ایک پرامن قوم ہیں اور کسی سے جنگ یا کشیدگی نہیں چاہتے لیکن اگر جنگ مسلط کی گئی تو اسے منطقی انجام تک پہنچائیں گے۔
عظمیٰ بخاری نے کہا کہ پنجاب کے عوام کے لیے 2 بڑی خوشخبریاں ہیں۔ پہلی یہ کہ "ائیر پنجاب" کا منصوبہ مکمل ہو چکا ہے اور 4 طیارے لیز پر لے کر اندرون ملک پروازوں کا آغاز کیا جا رہا ہے، اور ایک سال کے اندر ائیر لائن کو بین الاقوامی پروازوں کے لیے لائسنس مل جائے گا۔ دوسری خوشخبری یہ ہے کہ پاکستان کی پہلی بلٹ ٹرین کا آغاز لاہور سے راولپنڈی کے درمیان کیا جا رہا ہے، جو 2 گھنٹے 20 منٹ میں یہ فاصلہ طے کرے گی۔ اس کے علاوہ پنجاب بھر میں مزید بلٹ ٹرین روٹس بنائے جائیں گے اور راولپنڈی سے مری تک "گلاس ٹرین" چلائی جائے گی۔
انہوں نے سوالات کے جوابات دیتے ہوئے کہا کہ پاکستان کا سی پیک منصوبہ دشمنوں کو ہمیشہ سے کھٹکتا رہا ہے اور مختلف دہشت گرد گروپوں کو سپورٹ کر کے اسے سبوتاژ کرنے کی کوششیں کی جا رہی ہیں۔ صنم جاوید جیسے افراد پر وقت ضائع کرنے کے بجائے قوم کو یکجہتی کی ضرورت ہے۔ سیاسی جماعتوں کو چاہیے کہ وہ اپنا محاسبہ کریں اور سطحی بیانات سے گریز کریں۔
عظمیٰ بخاری نے واضح کیا کہ پاکستان کی ایک انچ زمین پر قبضہ کرنے کی بھارتی خواہش کبھی پوری نہیں ہو سکتی اور نہ ہی بھارتی جارحیت کبھی ہماری سرحدوں کو عبور کر سکتی ہے۔
انہوں نے کہا کہ ریلوے کے شعبے میں بھی اب جدید خطوط پر بہتری لانے کا منصوبہ بنایا گیا ہے اور ریلوے کی بحالی کے لیے محکمہ ریلوے کے ساتھ مل کر کام کیا جائے گا۔ پاکستان ہماری ریڈ لائن ہے، کوئی بھی اے، بی، سی، ڈی گروہ قوم کی توجہ اصل مسائل سے ہٹانے میں کامیاب نہیں ہو سکے گا۔
