مئی کے پہلے ہفتے میں طوفانی بارش  اور آندھی کی پیش گوئی،  این ڈی ایم اے  نے  الرٹ جاری کردیا 

 

 اسلام آباد(آئی این پی )   نیشنل ڈیزاسٹر مینجمنٹ اتھارٹی (این ڈی ایم اے ) نے یکم  تا 7 مئی کے دوران ممکنہ موسمی صورتحال پرایڈوائزری جاری کردی۔

جاری ایڈوائزری میں کہا گیا  ہے کہ 30 اپریل سے مغربی سسٹم بالائی علاقوں میں داخل ہو گا، جس کے باعث خیبر پختونخوا، گلگت بلتستان اور شمالی پنجاب، وسطی پنجاب اور جموں و کشمیر ، شمالی بلوچستان اورجنوبی سندھ میں شدید بارش، آندھی اور ژالہ باری کی پیش گوئی کی ہے۔

حکام نے خبردار کیا شدید بارشوں سے نشیبی علاقوں میں سیلابی صورتحال اورپہاڑی علاقوں میں لینڈ سلائیڈنگ کاخدشہ ہے ، اس کے پیش نظر متعلقہ ادارے  ممکنہ ہنگامی صورتحال سے نمٹنے کے لیے پیشگی اقدامات یقینی بنائیں۔این ڈی ای اے کا کہنا تھا کہ فوری رسپانس اورعوامی تحفظ یقینی بنانے کیلئے صوبائی اورضلعی ڈیزاسٹر مینجمنٹ اداروں کیساتھ رابطے میں رہیں۔

این ڈی ایم اے نے شہریوں کو مشورہ دیا ہے کہ وہ چوکس رہیں، حفاظتی احتیاطی تدابیر پر عمل کریں اور ریئل ٹائم اپ ڈیٹس کے لیے پاک این ڈی ایم اے ڈیزاسٹر الرٹ ایپ کا استعمال کریں۔پی ڈی ایم اے کا کہنا تھا کہ گرمی سے ہیٹ اسٹروک اورآبی ذخائرپرپانی کے دباؤ کا امکان ہے، کسان فصلوں کے لیے  پانی کامناسب انتظام کریں۔