لاہور کی فضاء میں نمایاں بہتری، اینٹی سموگ ایکشن مؤثر انداز میں جاری ہے : سینئر وزیر مریم اورنگزیب
لاہور ( ڈیلی پاکستان آن لائن ) لاہور کی فضاء میں نمایاں بہتری، اے کیو آئی کم ہو کر 110 کی سطح پر آ گئی ۔
تفصیلات کے مطابق موسمی نمی کے باعث سموگ کے مضر ذرات فضاء سے بڑی حد تک صاف ہو گئے ، لاہور شہر میں اس وقت سموگ نہیں، سرد موسم کی قدرتی فوگ موجود ہے ۔فوگ کا تعلق موسم سے ہے، صنعتی یا ٹریفک آلودگی سے براہِ راست ربط نہیں۔سائنسی طور پر موجودہ صورتحال سموگ کی تعریف میں شامل نہیں۔
سینئر وزیر مریم اورنگزیب نے کہا ہے کہ ہوا کی رفتار میں اضافے سے آلودگی کے ذرات کے پھیلاؤ میں مدد ملی،وزیراعلیٰ مریم نواز کے احکامات پر اینٹی سموگ ایکشن مؤثر انداز میں جاری ہے ۔دھواں چھوڑنے والی گاڑیوں اور آلودگی پھیلانے والی صنعتوں کے خلاف کارروائیاں کی جا رہی ہیں ۔اینٹوں کے بھٹوں کی سخت نگرانی کی جا رہی ہے اور ماحولیاتی قوانین پر عملدرآمد یقینی بنایا جا رہا ہے ۔
سینئر وزیر مریم اورنگزیب کا مزید کہنا تھا کہ ای پی اے اور ضلعی انتظامیہ کی زیرو ٹالرنس پالیسی کے مثبت اثرات سامنے آئے ہیں ،مسلسل مانیٹرنگ سے فضائی معیار میں واضح اور عملی بہتری آئی ،فوگ کو سموگ قرار دینا درست نہیں، حقائق کو مدنظر رکھا جائے۔
محکمہ صحت نے فوگ کے دوران احتیاطی تدابیر اپنانے کی ہدایت کی ہے ،کم حدِ نگاہ میں محتاط ڈرائیونگ کریں ، مریض حضرات ماسک کا استعمال کریں۔
