وزیراعلیٰ کا رمضان پیکج سے اضافی رقم لینے پرسخت نوٹس،سرچ آپریشن اور سخت کارروائی کا حکم
لاہور( ڈیلی پاکستان آن لائن )وزیراعلیٰ مریم نوازنے رمضان پیکج سے اضافی رقم لینے پرسخت نوٹس لیتے ہوئےسرچ آپریشن اور سخت کارروائی کا حکم دیدیا۔
تفصیلات کے مطابق وزیراعلیٰ پنجاب مریم نواز کی ہدایت پر رمضان پیکج پر اضافی رقم لینے والوں کے خلاف سخت ترین کارروائی کا آغاز کر دیا گیا ہے۔ قصور، بھکر اور گوجرانوالہ میں کارروائی کے دوران تین ملزمان کو گرفتار کیا گیا اورغیرقانونی دھندے میں ملوث ایجنٹس بلیک لسٹ کر دئیے گئے۔ قصور میں 10 ہزار روپے رمضان پیکج کی رقم پر 500 روپے غیرقانونی طور پر لینے والا ملزم بلال کو گرفتار کر لیا گیا۔ پولیس نے مکہ موبائل شاپ اور بھکر میں ایلفا ریٹیلر سیل کر دیں، ملزمان پر مقدمات درج کرلیا اور مشینیں بھی تحویل میں لے لی گئیں۔
وزیراعلیٰ مریم نواز نے رمضان پیکج سے اضافی رقم لینے کے واقعہ کا سخت نوٹس لیتے ہوئے پولیس اور انتظامیہ کو سرچ آپریشن کرنے اور ملزمان کے خلاف قانون کے تحت کارروائی کی ہدایت کی۔ وزیراعلیٰ مریم نواز نے کہا کہ نادار غریبوں سے رقم وصول کرنے والے کسی رعایت کے مستحق نہیں۔ وزیراعلیٰ نے عوام سے اپیل کی کہ رمضان پیکج حاصل کرنے والوں کو ایسی کسی بھی شکایت پر فوری شکایات درج کرا ئیں۔ پنجاب حکومت مستحقین کو قطار سے بچانے کے لیے اس بار نقد رقوم ڈیجیٹل ٹیکنالوجی سے فراہم کررہی ہے۔
