جھوٹ  کے  بازار   میں   سچائیاں  ملتی  نہیں۔۔۔

آج    اک    آواز   پھر  دل  کے  مکاں سے آ گئی
اتنی  ویرانی  مرے   دل  میں  کہاں سے آ گئی 

خانہِ دل    میں   ہر   اک  جانب   اجالا   ہو گیا 
روشنی  کی  اک  کرن  جب  لا مکاں سے آ گئی 

جھوٹ  کے  بازار   میں   سچائیاں  ملتی  نہیں
میری  خودداری  پلٹ  کر   ہر   دکاں سے آ گئی

سہمی سہمی سی کلی ہے پھول پتے ہیں اداس
وہ    تباہی    آج     پھر     دورِ خزاں سے آ گئی

کیسے الفت  کے  چراغوں کو  بھلا روشن کروں
تیرگی نفرت  کی دل  میں جب گماں سے آ گئی

جانے  کب  تکمیل تک پہنچے گی  اس کی آرزو 
لوٹ  کر    فریاد    پھر    صحنِ بتاں سے آ گئی

گفتگو  کرنے   کا   تب    سے   ہی   سلیقہ  آ گیا 
جب   سے  شیرینی   ذرا   اردو  زباں سے آ گئی 

شہر  میں  ہے  بھیڑ  ان کی  آج  ہر سو دیکھیے 
کتنی  نفرت   شرپسندوں   کے   بیاں سے آ گئی 

بڑھتے  رہنا   ہے   سدا   منزل  کو  پانے  کے  لئے
اک حرارت مجھ  میں بھی دورِ رواں سے آ گئی

دل  کہیں  بھی ایک پل کو  اب  ٹھہرتا ہی نہیں 
جستجوئے   خاک   منزل   کے   نشاں سے آ گئی

آج  منظر  میں  بھی  اپنی  آخری  منزل پہ ہوں 
زندگی  میری   نکل  کر   جسم و جاں سے آگئی

کلام :منظر اعظمی ( بھارت )