اپرکرم میں مزید 10بنکرز گرا دیئے گئے،تعداد 48ہوگئی
پارا چنار (ڈیلی پاکستان آن لائن )اپرکرم میں امن معاہدے کے تحت فریقین کے مزید 10بنکرز گرا دیئے گئے۔
نجی ٹی وی"جیو نیوز "کے مطابق ضلع کرم میں بنکر گرانے کا سلسلہ جاری ہے۔ اپرکرم کے علاقے پیواڑ اور گیدو میں مزید 10 بنکرز گرادیئے گئے جس کے بعد اب تک 48 بنکرز گرائے جاچکے ہیں۔
ادھر ٹل پارا چنار روڈ کی گزشتہ ساڑھے چار ماہ کی بندش کے باعث لوگوں کو شدید پریشانی ہے۔شہری خوراک و علاج نہ ملنے سے مختلف قسم کے مسائل سے دوچار ہیں جبکہ بیرونِ ملک جانے والے مسافر اور طلبہ پھنسے ہوئے ہیں۔
رکن صوبائی اسمبلی علی ہادی عرفانی نے مطالبہ کیا ہے کہ 5 لاکھ کے قریب آبادی کیلئے ہنگامی بنیادوں پر امدادی پیکیج دیا جائے۔
سرکاری ذرائع کے مطابق حکومت نے فریقین کے اسلحہ جمع کرانے کے مجوزہ طریقہ کار پر عمل درآمد سے متعلق غور شروع کردیا ہے ، مناسب طریقہ کار پر متفق ہوتے ہی فریقین کو آگاہ کردیا جائے گا۔
جمعرات کو کمشنر ہاؤس کوہاٹ میں ہونے والے جرگے میں فریقین نے ہتھیار جمع کرانے کے طریقہ کار سے حکومت کو آگاہ کیا تھا۔
