پبلک ٹوائلٹ میں چھوڑی گئی نومولود بچی کو سینیٹری ورکرز نے بچالیا

نئی دہلی (ڈیلی پاکستان آن لائن) بھارتی ریاست تامل ناڈو میں کسی سنگ دل نے انتہائی شقاوت کا مظاہرہ کرتے ہوئے ایک نومولود بچی کو پبلک ٹوائلٹ میں چھوڑ دیا۔ سینیٹری ورکرز نے بچی کو ریسکیو کرکے اسپتال منتقل کیا۔

تامل ناڈو کے ایک دور افتادہ ضلع میں بس اسٹینڈ کے نزدیک واقع پبلک ٹوائلٹ میں جب سینیٹری ورکرز نے صفائی شروع کی تو دیکھا کہ کسی نے نومولود  بچی کو زمین پر لِٹاکر اُس پر کچرے کی ٹوکری اُلٹی رکھ دی تھی۔

بچی کی حالت تھوڑی سی خراب دکھائی دے رہی تھی۔ سینیٹری ورکرز بچی کو لے کر فوراً اسپتال پہنچے جہاں ڈاکٹرز نے بچی کا بھرپور معائنہ کیا اور مناسب طبی امداد دی۔ اب بچی کی حالت مستحکم بتائی جاتی ہے۔

تامل ناڈو میں3 دن کے دوران یہ اپنی نوعیت کا دوسرا واقعہ ہے۔ 3 دن قبل ایک گاؤں میں کوئی شخص ایک نومولود کو مکان کے پچھلے حصے میں رکھ کر چلا گیا تھا۔ گاؤں کے لوگوں نے نومولود کو بروقت نہ دیکھا ہوتا تو آوارہ کتے اُسے بھنبھوڑ کھاتے۔