دبلا ہونے کیلئے کھانا چھوڑ کر 6 ماہ تک پانی پر گزارا کرنیوالی لڑکی چل بسی

نئی دہلی (ڈیلی پاکستان آن لائن )دبلا پتلا اور سمارٹ نظر آنے کی خواہش تقریباً تمام ہی لڑکیوں کو ہوتی ہے جس کیلئے خواتین مختلف ورزش کے ساتھ ساتھ ڈائٹنگ بھی کرتی ہیں۔
نجی ٹی وی جیونیوز نے بھارتی میڈیا رپورٹس کے حوالے سے بتایا کہ بھارتی شہر تھیلاسری سے تعلق رکھنے والی 18 سالہ لڑکی کی سمارٹ نظر آنے کی خواہش اس کی زندگی کے خاتمے کا سبب بن گئی۔
بھارتی میڈیا کے مطابق 18 سالہ سری نندا وزن کم کرنے کیلئے مختلف ٹوٹکوں پر عمل کرتی تھی اور وہ گزشتہ 6 ماہ سے صرف پانی پر زندہ تھی، جس پر اس کی طبیعت بگڑگئی۔
ڈاکٹرز کا بتانا ہے کہ سری نندا کی حالت خراب ہونے کی وجہ سے اسے آئی سی یو میں وینٹی لیٹر پر رکھا گیاتھا، سری نندا کا وزن صرف 24 کلو تھا اور اس کا شوگر لیول، سوڈیم اور بی پی کم تھا تاہم طبی امداد کے باوجود اس کی حالت بہتر نہ ہوسکی اور وہ دم توڑ گئی۔
ڈاکٹر کے مطابق 18 سالہ لڑکی anorexia نامی بیماری میں مبتلا تھی ، اس بیماری میں لوگوں کو وزن کم کرنے کا خیال رہتا ہے اور وہ کھانا پینا چھوڑ دیتے ہیں۔
دوسری جانب لڑکی کے والدین کا بتانا ہے کہ بیٹی کو کھانا دیا جاتا تھا لیکن وہ کھانے کو چھپا دیتی تھی اور صرف گرم پانی پر گزارا کرتی تھی۔