ضلعی حکومتوں کو تحلیل کرنے کیخلاف کیس میں سیکرٹری لوکل گورنمنٹ جواب سمیت طلب
لاہور(ڈیلی پاکستان آن لائن)لاہور ہائیکورٹ نے ضلعی حکومتوں کو تحلیل کرنے کیخلاف کیس میں آئندہ سماعت پر سیکرٹری لوکل گورنمنٹ کو جواب سمیت طلب کرلیا۔
نجی ٹی وی چینل دنیا نیوز کے مطابق لاہور ہائیکورٹ میں ضلعی حکومتوں کو تحلیل کرنے کیخلاف کیس کی سماعت ہوئی،جسٹس شجاعت علی خان نے کیس کی سماعت کی،ایڈیشنل ایڈووکیٹ جنرل رانا شمشاد عدالت پیش ہوئے،سرکاری وکیل نے وزیراعلیٰ پنجاب کو فریق بنائے جانے پر اعتراض اٹھا دیا، سرکاری وکیل نے کہاکہ 26ویں آئینی ترمیم کے بعد وزیراعلیٰ کو براہ راست فریق نہیں بنایا جا سکتا، وکیل درخواست گزار نے کہاکہ درخواست میں وزیراعلیٰ کے پرنسپل سیکرٹری کو فریق بنایا گیا ہے،سرکاری وکیل نے کہاکہ وزیراعلیٰ اور سیکرٹری لوکل گورنمنٹ بیرون ملک ہیں،وزیراعلیٰ اور سیکرٹری کے وطن واپس آتے ہی جواب جمع کرا دیا جائے گا۔
الیکشن کمیشن کے وکیل عمران رانجھا نے جواب عدالت میں جمع کرا دیا، وکیل الیکشن کمیشن نے کہاکہ ضلعی حکومتوں کے قیام کیلئے حکومت سے خط و کتابت جاری ہے،لوکل گورنمنٹ انتخابات قوانین کی روشنی میں کرائے جائیں گے ، عدالت نے آئندہ سماعت پر سیکرٹری لوکل گورنمنٹ کو جواب سمیت طلب کرلیا۔
