وفاقی وزیر مذہبی امور کی 15مارچ، بروز ہفتہ یوم خاتم النبین ؐ منانے کی اپیل
اسلام آباد (آن لائن)وفاقی وزیر مذہبی امور سردار محمد یوسف نے 15 مارچ بروز ہفتہ یوم خاتم النبیین منانے کی اپیل کرتے ہوئے نوجوان نسل سے اپیل کی ہے سوشل میڈیا کا استعما ل کرتے ہوئے کسی قسم کے گستاخانہ مواد کو پوسٹ کرنے یا شیئر کرنے سے گریز کریں، نیز ایسے کسی بھی متنازعہ مواد کی شکایت وزارت مذہبی امور کے آن لائن پورٹل پر کر یں۔ وزارت مذہبی امور سے جاری شدہ ویڈیو پیغام میں وفاقی وزیر مذہبی امور سردار حضرت محمد یوسف نے کہا رسول اللہ ؐنہ صرف مسلمانوں کیلئے مقدس ترین شخصیت ہیں بلکہ دیگر مذا ہب سے تعلق رکھنے والے افراد بھی انہیں ایک عظیم شخصیت کے طور پر دیکھتے اور جانتے ہیں۔ رسول اکرم ؐکا ادب اور احترام کرنا ایمان کا لازمی جز وہے۔ خاتم النبیّین حضرت محمد رسول اللہ ؐکی شان میں کسی بھی صورت میں گستاخی یا بے حرمتی نہ صرف اسلام بلکہ ”تعزیرات پاکستان سیکشن 295۔سی“ کے تحت سنگین ترین جرم ہے جس کی سزا صرف اور صرف سزائے موت ہو سکتی ہے، وزارت مذہبی امور و بین المذاہب ہم آہنگی نے معاشرے میں ناموس رسالت ؐکی اہمیت کو اجاگر کرنے اور سوشل میڈیا پر موجود متنازعہ توہین آمیز موادکی روک تھام کیلئے 15 مارچ بروز ہفتہ کو ”یوم تحفظ ِ ناموسِ رسالت ؐ“منانے کا فیصلہ کیا ہےِ اس ضمن میں تمام صوبوں بشمول گلگت بلتستان اور آزاد جموں کشمیر کو ہدایات جاری کی گئی ہیں وہ عوامی آگہی کاآغاز کریں۔ میری ملک بھر کے علماء و خطباء حضرات سے گذارش ہے جمعہ کے خطبات میں تحفظ ناموس رسالت ؐ کی اہمیت سے متعلق آگہی دی جائے، عوام الناس خصو صا نوجوان نسل سے اپیل ہے سوشل میڈیا کا استعمال کرتے ہوئے کسی قسم کے گستاخانہ مواد کو پوسٹ کرنے یا شیئر کرنے سے گریز کریں، نیز ایسے کسی بھی متنازعہ مواد کی شکایت وزارت مذہبی امور کے آن لائن پورٹل پر کریں۔
وفاقی وزیرمذہبی امور
