ڈیم پائپ لائن سے گوادر میں پینے کے پانی کا مسئلہ حل ہو گیا

گوادر (آئی این پی) شادی کور اور سواد ڈیموں سے پانی کی ترسیل کے لیے تعمیر کی گئی 158 کلومیٹر طویل پائپ لائن کی تکمیل سے گوادر شہر کے مکینوں کے لیے پانی کی کمی کا مسئلہ کامیابی سے حل ہو گیا ہے۔

گوادر پرو کے مطابق ڈائریکٹر جنرل گوادر ڈویلپمنٹ اتھارٹی ( جی ڈی اے ) مجیب الرحمان قمبرانی نے کہا ہے کہ جی ڈی اے نے گوادر ٹاون میں پانی کے سب سے مشکل منصوبوں میں سے ایک کامیابی سے مکمل کیا ہے،  جی ڈی اے نے شہر کے ہر گھر تک پینے کے پانی کی رسائی کو یقینی بنانے کے لیے ایک نئی 141 کلومیٹر پانی کی تقسیم کی پائپ لائن بھی بچھائی ہے، گھروں کو نئے کنکشن فراہم کیے جا رہے ہیں، وافر پانی دستیاب ہےاور روزانہ کی طلب سے بھی زیادہ  ہے۔

رپورٹ کے مطابق جی ڈی اے نے گوادر شہر کے مختلف حصوں میں 10 ملین گیلن پانی ذخیرہ کرنے کی اجتماعی گنجائش کے ساتھ چار زیر زمین سٹوریج ٹینک بنائے ہیں، منصوبے کے پیمانے کے باوجود، تمام متعلقہ سرکاری حکام کی مستعد نگرانی کی بدولت پانی کی پائپ لائن کے منصوبے تیزی سے مکمل ہوئے۔ پانی کی فراہمی اب شہر کے تمام باشندوں تک مسلسل پہنچ رہی ہے، یہ ایک ایسی ترقی ہے جس کا گوادر کے رہائشیوں نے گرمجوشی سے استقبال کیا ہے۔