چیمپئینز ٹرافی؛ بھارتی بورڈ نے پاکستان کو ہائبرڈ ماڈل پر منانے کیلئے کیا کام شروع کر دیا؟
نئی دہلی (ویب ڈیسک) آئی سی سی چیمپئینز ٹرافی کیلئے پاکستان آنے کے بعد ہائبرڈ ماڈل پر قائل کرنے کیلئے بھارتی بورڈ (بی سی سی آئی) پی سی بی کو مالی نقصان سے ڈرانے لگا۔
نجی ٹی وی ایکسپریس نیوز کے مطابق رپورٹس کے مطابق چیمپئینز ٹرافی پاکستان سے کسی دوسرے ملک منتقل ہوئی تو 65 ملین ڈالر میزبانی فیس سے ہاتھ دھونا پڑیں گے جبکہ دستبرداری کی صورت میں پابندیوں کے ساتھ ریونیو شیئر سے بھی محروم ہونا پڑسکتا ہے۔
پاکستان نے بھارت کو چیمپئینز ٹرافی کیلئے اپنی ٹیم نہ بھیجنے پر سخت جواب دینے کا عندیہ دیا ہے، جس پر بھارت نے اپنے میڈیا کے ذریعے پی سی بی کو مالی نقصان سے ڈرانا شروع کردیا ہے۔
چیمپئنز ٹرافی آئندہ برس 19 فروری سے 9 مارچ تک پاکستان کے 3 شہروں کراچی، لاہور اور راولپنڈی میں شیڈول ہے، بھارت ٹیم بھیجنے سے انکار کے بعد ہائبرڈ ماڈل اپنانے کیلیے آئی سی سی پر دباؤ ڈال رہا ہے۔
رپورٹس میں کہا گیا ہے کہ پاکستان کی جانب سے ایونٹ میں شرکت نہ کرنے سے آئی سی سی کو بھی چیلنجز کا سامنا کرنا پڑے گا جبکہ براڈکاسٹرز اور سپانسرز دونوں ہی توقع کرتے ہیں کہ آئی سی سی ایونٹس میں روایتی حریفوں کے درمیان مقابلہ ہوگا۔
