بھارت میں پولیس کا انوکھا کارنامہ، ملزم کی بجائے جج کا نام چوری کے کیس میں ڈال دیا
نئی دہلی (آئی این پی)بھارت میں پولیس نے چوری کے کیس میں ملزم کے بجائے جج کا نام ڈال دیا۔
بھارتی میڈیا کے مطابق ریاست اترپردیش کے شہر فیروزآباد میں ایک چوری کا کیس عدالت میں لایا گیا جس میں عدالت نے ملزم کے ناقابل ضمانت وارنٹ جاری کرنے کا حکم دیا۔میڈیا رپورٹس میں بتایا گیا ہے کہ کہانی میں نیا موڑ اس وقت آیا جب پولیس افسر نے ملزمان کی فہرست بنانے کے بجائے غلطی سے جج کا نام وارنٹ میں ڈال دیا۔
میڈیا رپورٹس کے مطابق پولیس افسر نے ملزم راج کمار کی بجائے جج نغمہ خان کا نام وارنٹ میں شامل کیا جب کہ عدالت نے ملزم راج کمار کے ناقابل ضمانت وارنٹ جاری کرنے کا حکم دیا تھا۔میڈیا رپورٹس کے مطابق جج نے اپنا نام وارنٹ میں دیکھ کر پولیس اہلکار کو معطل کردیا اور ساتھ ہی سنگین غلطی کے لیے پولیس افسر کے خلاف انکوائری کا حکم بھی دیا جس پر سینئر پولیس افسر نے غلطی سامنے آنے کے بعد کارروائی کرتے ہوئے سب انسپکٹر کو پولیس لائنز بھیجنے کا حکم دیا۔
