جیف بیزوس کا دوسری شادی کا فیصلہ ، دلہن کون ہے؟
واشنگٹن (ڈیلی پاکستان آن لائن) ایمازون کے بانی جیف بیزوس اور ان کی منگیتر لورین سانچیز اس موسم گرما میں اٹلی کے شہر وینس میں شادی کے بندھن میں بندھنے جا رہے ہیں۔ یہ شادی ان کی منگنی کے تقریباً دو سال بعد ہو رہی ہے۔ دونوں نے مئی 2023 میں منگنی کی تھی ۔ 61 سالہ بیزوس اور 55 سالہ سانچیز نے اپنی سابقہ شادیوں کا اختتام 2019 اور 2023 میں کیا تھا۔
پیج سکس کی رپورٹ کے مطابق جوڑے نے شادی کے دعوت نامے بھیجنے کا عمل شروع کر دیا ہے۔ اگرچہ شادی کی حتمی تاریخ ابھی راز میں رکھی گئی ہے لیکن ذرائع کا کہنا ہے کہ یہ تقریب ممکنہ طور پر جون میں منعقد ہو سکتی ہے۔ افواہوں کے مطابق جوڑا اپنی شادی جیف بیزوس کے لگژری 500 ملین ڈالر کے سپر یاٹ "کورو" پر کرے گا، جو اٹلی کے ساحل کے قریب موجود ہو گا۔ اس مقام کی خاص اہمیت ہے، کیونکہ یہ وہی جگہ ہے جہاں بیزوس نے سانچیز کو پرپوز کیا تھا اور بعد میں انہوں نے اپنی منگنی کی تقریب بھی یہیں منائی تھی۔
اس ہائی پروفائل شادی کی مہمانوں کی فہرست میں ٹیکنالوجی اور انٹرٹینمنٹ انڈسٹری کی کئی نامور شخصیات شامل ہونے کی توقع ہے۔ ان کی منگنی کی تقریب میں مائیکروسافٹ کے بانی بل گیٹس اور ان کی ساتھی پاؤل ہرد سمیت کئی مشہور شخصیات نے شرکت کی تھی۔ اس تقریب میں اوپرا ونفری، کرس جینر، سلمیٰ ہائیک پینالٹ، باربرا اسٹریسینڈ، مرانڈا کر، سوکی واٹر ہاؤس اور رابرٹ پیٹنسن جیسے اے لسٹ ستارے بھی شریک تھے۔
لورین سانچیز نے 2018 میں جیف بیزوس کے ساتھ ڈیٹنگ شروع کی تھی۔ جولائی 2019 میں بیزوس کی اپنی پہلی بیوی میکنزی سکاٹ سے طلاق کے بعد انہوں نے اپنی محبت کا باضابطہ اعلان کیا۔ ارب پتی بیزوس نے 2023 میں اپنے سپر یاٹ پر یورپ کے سفر کے دوران سانچیز کو پرپوز کیا۔ اگلے ہی دن سانچیز کو ایک بڑی ہیرے کی انگوٹھی پہنے دیکھا گیا، جس کی مالیت تقریباً ڈھائی ملین ڈالر تھی۔
لورین سانچیز 1969 میں امریکی شہر البوکرکی میں پیدا ہوئیں۔ وہ ایک سابق براڈکاسٹ جرنلسٹ ہیں، جنہوں نے بطور انٹرٹینمنٹ رپورٹر اور نیوز اینکر کام کیا۔ سنہ 2011 سے 2017 تک، انہوں نے مارننگ شو "گڈ ڈے ایل اے" کی میزبانی کی، جبکہ وہ "دی لانگیسٹ یارڈ"، "فلائٹ کلب" اور "ٹیڈ 2" جیسی فلموں میں بھی نظر آئیں۔ ان کے پاس ہیلی کاپٹر پائلٹ کا لائسنس بھی موجود ہے۔
سنہ 2016 میں سانچیز نے "بلیک اوپس ایوی ایشن" کے نام سے اپنی کمپنی قائم کی جو اپنی نوعیت کی پہلی خاتون کی ملکیت والی فضائی فلم اور پروڈکشن کمپنی ہے۔ وہ "بیزوس ارتھ فنڈ" کی وائس چیئر کے طور پر بھی خدمات انجام دے رہی ہیں۔
اس سے پہلے سانچیز ہالی ووڈ ایجنٹ پیٹرک وائٹسل سے شادی شدہ تھیں، جن سے ان کے دو بچے ایلا اور ایون ہیں۔ اس کے علاوہ وہ سابق این ایف ایل کھلاڑی ٹونی گونزالیز کے ساتھ ان کا ایک 23 سالہ بیٹا نیکو کی بھی ہے۔
