گلگت بلتستان سیلاب سے تباہی کے باعث غذر میں 63 اسکول بند، خیمہ بستی قائم

گلگت (ڈیلی پاکستان آن لائن) ضلع غذر میں سیلاب کی تباہ کاریوں کے باعث 63 اسکولوں کو 25 اگست تک بند رکھا گیا تھا، جس میں اب توسیع کئے جانے کا امکان ہے۔ 

حکومت گلگت بلتستان کے ترجمان فیض اللہ فراق نے بتایا کہ غذر میں 63 اسکولوں کی بندش کی تاریخ میں توسیع کا امکان ہے۔مکانات کی بڑے پیمانے پر تباہی کے باعث غذر تالی داس میں خیمہ بستی قائم ہو چکی ہے اور ڈیزاسٹر مینجمنٹ غذر کی جانب سے تالی داس  کے لیے 150 سے زائد  خیمے فراہم کیے جاچکے ہیں۔متاثرین کے لیے 300 سے زائد فوڈ پیکٹس فراہم کیے گئےہیں، 150 سے زائد کیچن سیٹ، متاثرین میں 150 سے زائد ہائی جین کیٹس فراہم کیے جا چکے ہیں۔

فیض اللہ فراق کا کہنا تھا کہ 150 سے زائد ترپال اور شیڈس، 150 سے زائد پلاسٹک میٹس، 150 سے زائد واٹر کولرز اور دو ہزار سے زائد منرل واٹر کی بوتلیں فراہم کی جاچکی ہیں۔تالی داس کے مقام پر بننے والی مصنوعی جھیل کی روزانہ کی بنیاد پر نگرانی ہو رہی ہے۔صوبائی حکومت کی طرف سے  متاثرہ علاقے میں میڈیکل کی ٹیمیں اور ایمبولینسس موجود ہیں۔