برقعہ پہن کر موٹرسائیکل پر گھومنے والے 2 نوجوان گرفتار
میانوالی (ڈیلی پاکستان آن لائن )عیسیٰ خیل میں نوجوانوں کوٹک ٹاک پرویڈیو بنانے کا جنون مہنگا پڑ گیا۔ پولیس نےخواتین کا برقعہ پہن کر موٹرسائیکل پر گھومنے والے دونوں نوجوانوں کو گرفتارکرلیا۔
نجی ٹی وی آج نیوز کے مطابق نواحی علاقہ کمرمشانی میں دو نوجوانوں نے خواتین کا روایتی شٹل کاک برقعہ پہن کر موٹر سائیکل چلایا اور ویڈیو سوشل میڈیا پر اپ لوڈ کردی۔ڈی پی اومیانوالی مطیع اللہ خان کے نوٹس پر پولیس نے موٹر سائیکل پر گھومنے والے دونوں نوجوان اشرف اورعزیز اللہ کو حراست میں لیکر پابند سلاسل کردیا۔دونوں ملزمان کے خلاف مزید قانونی کارروائی عمل میں لائی جا رہی ہے۔ ڈی پی او کے مطابق معاشرے میں بگاڑ پیدا کرنے والے فعل ہرگز قبول نہیں۔ ایسے عناصر کے خلاف قانون کے مطابق کارروائی کی جائے گی۔
