آئی فون کے وہ حیران کن فیچرز جو آپ کو آج تک کسی نے نہیں بتائے، گھر بیٹھے زندگی آسان بنائے

نیویارک(مانیٹرنگ ڈیسک) آئی فون کے کچھ ایسے خفیہ فیچرز ہیں جو اکثر لوگوں کو معلوم نہیں مگر یہ فیچرز آپ کی زندگی آسان بنا سکتے ہیں۔ میل آن لائن نے اپنی ایک رپورٹ میں ان فیچرز کے متعلق بتایا ہے۔ پہلا فیچر کیلولیٹر استعمال کرتے ہوئے داخل کی گئی رقم کا ایک ہندسہ ڈیلیٹ کرنا ہے۔ عام طور پر لوگ ایک ہندسہ غلط ڈائل ہونے پر پوری رقم ڈیلیٹ کرتے اور دوبارہ لکھتے ہیں لیکن اس فیچر کے ذریعے آپ پوری رقم کی بجائے صرف ایک ہندسہ بھی ڈیلیٹ کر سکتے ہیں۔ اس لیے آپ کو صرف اتنا کرنا ہے کہ لکھے گئے اعدادو کے اوپر اپنی انگلی ’سوائپ‘ کیجیے، اس سے آپ کا آخری ہندسہ خود بخود ڈیلیٹ ہو جائے گا۔
دوسراحیران کن فیچر کسی دستاویز کو ڈاﺅن لوڈ اور سکین کیے بغیر اس پر دستخط کرنا ہے۔ آپ کو ای میل میں کوئی دستاویز آئی ہے جس پر آپ کو دستخط کرنے ہیں تو اسے ڈاﺅن لوڈ کرنے کی بجائے صرف ’پری ویو‘ (Preview)کریں ۔ آپ کی سکرین کے اوپر دائیں کونے میں ٹول بکس آئیکن (Toolbox icon)نمودار ہو جائے گی۔ اس آئیکن پر کلک کرکے ’سگنیچر ‘ (Signature) کے بٹن کو دبائیں۔ اب اس دستاویز پر اپنی انگلی سکرین پر پھیرتے ہوئے دستخط کیجیے اور ’ڈن‘ (Done)پر کلک کرکے دستاویز جسے بھیجنی ہے بھیج دیں۔اس طریقے سے آپ دستاویز پر اگر کچھ تحریر کرنا چاہتے ہیں یا اس کا کوئی حصہ ہائی لائٹ کرنا چاہتے ہیں تو وہ بھی کر سکتے ہیں۔
آئی فون کا ایک خفیہ فیچر پیمائش کرنے والی ’ٹیپ‘ کا بھی ہے جس کے ذریعے آپ آئی فون کو استعمال کرتے ہوئے مختلف چیزوں کی پیمائش کر سکتے ہیں۔یہ فیچر آئی فون کی ’Measure app‘ میں ہے۔ جب آپ اس ایپ کو کھولیں گے تو یہ آپ کو کہے گی کہ آئی فون کو اس چیز کے ایک سرے سے دوسرے تک پھیریں تاکہ وہ اس کی پیمائش کر سکے۔ اس سے سکرین پر سفید نقطوں سے ایک لکیر بن جائے گی۔ اس لکیر کے سروں کو اس چیز کے لحاظ سے کھینچ کر برابر کریں جس کی آپ پیمائش کر رہے ہیں اور پھر سکرین پر موجود سفید بٹن کو دبا دیں۔
آپ کوئی پیغام لکھ رہے ہوں اور درمیان میں سے کوئی حرف یا لفظ کاٹ کر دوبارہ لکھنا پڑ جائے تو ’کرسر‘ (Cursor)کو اس جگہ پر لیجانا ایک امتحان ہوتا ہے تاہم آئی فون استعمال کرتے ہوئے آپ کی بورڈ کے ’سپیس‘ کے بٹن کے ذریعے یہ کام باآسانی کر سکتے ہیں۔ آپ کو صرف اتنا کرنا ہے کہ سپیس بار پر اس طرف انگلی پھیریں جس طرح آپ ’کرسر‘ کو لیجانا چاہتے ہیں اور درست جگہ پر لیجا کر چھوڑ دیں۔آئی فون پر آپ موسیقی خود بخود بند کرنے کا ٹائمر بھی سیٹ کر سکتے ہیں تاکہ آپ سو جائیں تو موسیقی چلتی نہ رہے بلکہ خود بخود بند ہو جائے۔ یہ فیچر آئی فون کی ’کلاک ایپ‘ میں ’ٹائمر‘ کے آپشن کے اندر موجود ہے۔ اس آپشن میں جا کر ٹائمر سیٹ کریں اور پھر ’وین ٹائمر اینڈز‘ (When Timer Ends)پر کلک کریںنیچے سکرول کرتے ہوئے جائیں اور ’سٹاپ پلینگ ‘(Stop Playing)کا آپشن منتخب کریں۔ اس طرح آپ نے جہاں ٹائمر سیٹ کیا ہو گا اس وقت پر پہنچ کر آپ کے آئی فون پر چلنے والی موسیقی خود بخود بند ہو جائے گی۔
آئی فون کے ذریعے آپ خودکار ایمرجنسی کالز بھی سیٹ کر سکتے ہیں۔ اس مقصد کے لیے آپ سیٹنگز میں جا کر ’ایمرجنسی ایس او ایس‘ کے آپشن میں جائیں اور ’آٹو کال‘ اور ’کال وِد سائیڈ بٹن‘ (Call with side button)کو ’اِن ایبل‘ (enable)کردیں۔ اس کے بعد اگر آپ کوایمرجنسی کال کرنی ہے تو سائیڈ بٹن کو پانچ بار دبائیں۔آپ کا فون خود بخود ایمرجنسی کال ملا دے گا۔