بی این پی ریڈ زون میں احتجاج کرنا چاہتی ہے، اجازت نہیں دیں گے : ترجمان بلوچستان حکومت

کوئٹہ ( ڈیلی پاکستان آن لائن ) ترجمان حکومتِ بلوچستان شاہد رند نے کہا ہے کہ بی این پی ریڈ زون میں احتجاج کرنا چاہتی ہے، جس کی   اجازت نہیں دیں گےاگر اختر مینگل بضد رہیں گے تو حکومت کے پاس آپشنز موجود ہیں۔

ترجمان حکومتِ بلوچستان شاہد رند نے پریس کانفرنس میں کہا ہے کہ سردار اختر مینگل کے ساتھ حکومتی کمیٹی نے 2نشستیں کی ہیں، صوبائی حکومت نے انہیں سریاب روڈ پر جگہ کی پیشکش کی ہے۔ بی این پی ریڈ زون میں احتجاج کرنا چاہتی ہے، اس کی اجازت نہیں دی جائے گی۔صوبائی حکومت کی کوشش یہی تھی کہ سیاسی ڈائیلاگ سے معاملے کو حل کیا جائے، جس کے لیے دونوں اطراف کو لچک دکھانا ہو گی۔

"جنگ " کے مطابق ان کا کہنا ہے کہ بی این پی کوئٹہ کی طرف لانگ مارچ کا اعلان کر چکی ہے، وہاں دفعہ 144نافذ ہے، دفعہ 144 کی خلاف ورزی کی گئی تو قانون اپنا راستہ لے گا۔ اختر مینگل بضد ہیں کہ ان کا احتجاج ریڈ زون پر ہو گا، افغان مہاجرین سے متعلق وفاقی حکومت کے فیصلے پر من و عن عمل ہو گا۔