سولرپینلز کی چوری کے شبے میں 2 بھائیوں کو ’وڈیرے‘ نے گولی مار کر قتل کر دیا

خیرپور(مانیٹرنگ ڈیسک) سندھ کے ضلع خیرپور میں وڈیرے نے سولرپینلز کی چوری کے شبے میں 2بھائیوں کو گولی مار کر قتل کر دیا۔ نجی ٹی وی چینل "24نیوز "کے مطابق ثناء اللہ اور عبدالشکور گنے کے کھیت میں کام کر رہے تھے، جب زمیندار نے اپنے ساتھیوں کے ہمراہ انہیں گولیاں مار دیں۔
یہ سفاکانہ واردات ضلع خیر پور کے علاقے فیض محمد بندو میں ہوئی۔  مقتولین کے باپ نذیر جامرو نے میڈیا سے گفتگو کرتے ہوئے بتایا کہ زمیندار کی طرف سے اس کے بیٹوں پر چوری کا جھوٹا الزام عائد کیا گیا۔ ایک دن قبل اس نے دونوں کو قتل کرنے کی دھمکی دی اور اگلے دن اپنے آدمیوں کو لے کر کھیتوں میں گیا اور انہیں قتل کر دیا۔
رپورٹ کے مطابق خیرپور پولیس نے موقع پر پہنچ کر مقتولین کی لاشیں مقامی ہسپتال منتقل کیں۔ سینئر سپرنٹنڈنٹ آف پولیس (ایس ایس پی) زیبر نذیر شیخ کا کہنا ہے کہ پولیس نے فوری کارروائی کرتے ہوئے 5 ملزمان کو گرفتار کر لیا ہے اور باقی کی گرفتاری کے لیے چھاپے مارے جا رہے ہیں۔