پنجاب پولیس کے 8 سرچ اینڈ سویپ آپریشنز، 498 افراد سے پوچھ گچھ، 4 مشتبہ افراد گرفتار
لاہور ( ڈیلی پاکستان آن لائن ) پنجاب پولیس کے انٹیلی جنس بیسڈ سرچ، سویپ اینڈ کومبنگ آپریشنز جاری ہیں جس کے تسلسل میں گذشتہ 24 گھنٹوں کے دوران 8 سرچ اینڈ سویپ آپریشنز کیے گئے اور 498 افراد سے پوچھ گچھ کی گئی جبکہ 4 مشتبہ افراد کو گرفتار کیا گیا۔
ترجمان پنجاب پولیس نے تفصیلات بتاتے ہوئے کہا کہ 371 کومبنگ آپریشنز کے دوران 12235 مشتبہ افراد کی چیکنگ اور 42 مشکوک افراد حراست میں لیے گئے۔سرچ آپریشنز، چیکنگ کے دوران سنگین جرائم میں ملوث 226 اشتہاری، 88 عدالتی مفروراور 48 عادی مجرمان گرفتار کیے گئے۔جرائم پیشہ و مشتبہ افراد کے قبضہ سے بڑی تعداد میں ناجائز اسلحہ اور گولیاں برآمد کی گئیں۔جرائم پیشہ افراد کے خلاف کارروائی کے دوران 02 مجرمان کیفرکردار کو پہنچے اور 03 و زخمی حالت میں گرفتار کیا گیا۔
آئی جی پنجاب ڈاکٹر عثمان انور نے کہا کہ دہشت گردوں اور جرائم پیشہ عناصر کی سرکوبی کے لئے پنجاب پولیس کی فرضی مشقیں بھی جاری ہیں۔فرضی مشقوں میں پنجاب پولیس، سی ٹی ڈی، سپیشل برانچ، ایلیٹ فورس، ریسکیو 1122 اور قانون نافذ کرنے والے اداروں کی ٹیمیں حصہ لے رہی ہیں۔
