پاکستان کے اہم سپن باؤلر کو بنگلہ دیش نے کوچ بنا دیا
ڈھاکہ (آئی این پی )بنگلہ دیش کرکٹ بورڈ (بی سی بی) نے عمر گل کے بعدسابق پاکستانی آف سپنر ارشد خان کو زمبابوے کیخلاف ہوم ٹیسٹ سیریز کیلئے اسپن بولنگ کوچ مقرر کر دیا، جو 20 اپریل کو سلہٹ میں شروع ہو رہی ہے۔
تفصیلات کے مطابق ارشد خان نے 1997 سے 2006 کے دوران 9 ٹیسٹ اور 58 ایک روزہ میچز کھیلے۔ وہ پاکستان خواتین کرکٹ ٹیم کے بھی کوچ رہ چکے ہیں۔ ارشد خان کا بنگلہ دیش کرکٹ بورڈ سے ابتدائی معاہدہ 3ماہ کا ہے لیکن پاکستان میں ٹی20 سیریز کے بعد دونوں فریقین کی رضامندی کی صورت میں معاہدے میں 2027 ورلڈ کپ تک توسیع کا امکان ہے۔
اس سے قبل بی سی بی نے سابق فاسٹ بولر عمر گل کو 3 ماہ کے لیے فاسٹ بولنگ کوچ مقرر کیا تھا، وہ بنگلہ دیش کے آئندہ 5 ٹی 20 میچز کیلئے دورۂ پاکستان میں ذمہ داریاں سنبھالیں گے۔ ان کے علاوہ بنگلہ دیش کرکٹ بورڈ نے جیمز پامٹ کو ورلڈ کپ 2027 تک فیلڈنگ کوچ تعینات کیا ہے۔ 56 سالہ جیمز 2018 سے 2023 تک آئی پی ایل میں ممبئی انڈینز کے اسسٹنٹ کوچ رہ چکے ہیں۔
