سرگودھا: اولاد نہ ہونے پر شوہر نے پہلی بیوی کیساتھ مل کر دوسری بیوی کو قتل کردیا

سرگودھا(ڈیلی پاکستان آن لائن)سرگودھا میں شوہر نے اولاد نہ ہونے پر پہلی بیوی کیساتھ مل کر دوسری بیوی کو قتل کرڈالا، واقعے کیخلاف پولیس نے مقدمہ درج کرلیا۔
نجی ٹی وی چینل آج نیوز ذرائع کے مطابق سرگودھا میں غریب خاندان پر قیامت ٹوٹ پڑی، محنت کش کی نوبیاہتا بیٹی کو سفاک شوہر نے اولاد نہ ہونے کا طعنہ دے کر قتل کر ڈالا۔اس سفاکیت میں اس کا ساتھ کسی اور نے نہیں بلکہ اس کی پہلی بیوی نے ہی دیا۔
گذشتہ سال قصبہ حسین شاہ کے رہائشی ناظم نے اپنی 18 سالہ بیٹی عائشہ کی شادی ساہیوال سے تعلق رکھنے والے شاہد سے کی تھی، شاہد کی یہ دوسری شادی تھی۔ذرائع نے بتایا کہ شاہد کو 12 سال سے پہلی اہلیہ شمائلہ سے کوئی اولاد نا تھی، دوسری شادی کو ابھی ایک سال بھی ناگزرا تھا کہ شاہد ںے اولاد نا ہونے پرعائشہ کو پہلی اہلیہ کی مدد سے پھانسی لگا کر مار ڈالا۔
واقعے پر غم سے نڈھال اہل خانہ نے وزیراعلیٰ پنجاب اور اعلیٰ حکام سے انصاف کی اپیل کردی ہے۔
دوسری جانب پولیس کا کہنا ہے کہ واقعہ کا مقدمہ مقتولہ کی والد کی مدعیت میں درج کرلیا گیا ہے، ملزمان کو جلد گرفتار کرلیا جائے گا۔