مارک کارنی کی غزہ میں جاری نسل کشی کی مخالفت، نیتن یاہو سیخ پا
تل ابیب(ڈیلی پاکستان آن لائن )اسرائیلی وزیرِ اعظم نیتن یاہو اپنے کینیڈین ہم منصب مارک کارنی کی غزہ میں جاری نسل کشی کی مخالفت پر سیخ پا ہو گئے۔
روز نامہ جنگ کے مطابق انہوں نے سماجی رابطے کی ویب سائٹ ایکس پر پوسٹ شیئر کر کے کینیڈا کے وزیرِ اعظم سے اپنے بیان سے پیچھے ہٹنے کا مطالبہ بھی کر دیا۔
یکس پر شیئر کی گئی پوسٹ میں نیتن یاہو کا کہنا ہے کہ کینیڈا نے ہمیشہ سویلائزیشن کا ساتھ دیا ہے، مسٹر کارنی کو بھی ایسا ہی کرنا چاہئے۔
ان کا کہنا ہے کہ مارک کارنی حماس کے بجائے یہودی ریاست کو تنقید کا نشانہ بنا رہے ہیں، اپنا غیر ذمے دارانہ بیان واپس لیں۔
واضح ہے کہ کینیڈا کے وزیرِ اعظم مارک کارنی نے اسرائیل پالیسی پر بات کرتے ہوئے کہا تھا کہ وہ غزہ میں جاری نسل کشی سے واقف ہیں اسی لئے اسلحے پر پابندی عائد کر رکھی ہے۔
مارک کارنی کے بیان کے بعد حاضرین نے کارنی کارنی کے نعرے بھی لگائے تھے۔
