ای سی او سفیروں اور نمائندوں کا ارفع ٹاور میں پنجاب آئی ٹی بورڈ آفس کا دورہ
لاہور ( ڈیلی پاکستان آن لائن) اقتصادی تعاون تنظیم (ای سی او) کے رکن ممالک کے سفیروں اور مستقل نمائندوں کے وفد نے اپنے لاہور کے دورے کے موقع پر ارفع ٹاور میں پنجاب آئی ٹی بورڈ کا دورہ کیا۔ پی آئی ٹی بی ڈائریکٹر جنرل وقار نعیم قریشی نے وفد کا استقبال کیا اور انہیں پی آئی ٹی بی کے اہم منصوبوں اور اقدامات کے بارے تفصیلی پریزنٹیشن دی جس میں پنجاب میں ڈیجیٹلائزیشن اور ٹیکنالوجی کے فروغ میں پنجاب آئی ٹی بورڈ کے کردار کو اجاگر کیا گیا۔ انہوں نے ای پے پنجاب، مریم کی دستک، ای خدمت مرکز، سٹارٹ اپس، الیکٹرانک فائل اینڈ آفس آٹومیشن سسٹم اور صحت، قانون و انصاف، تعلیم، سیاحت سمیت دیگر اہم شعبوں میں کیے گئے متعدد ڈیجیٹل اقدامات پر بھی روشنی ڈالی۔
اس موقع پر ای سی او سیکرٹری جنرل ڈاکٹر اسد مجید خان کا کہنا تھا کہ پی آئی ٹی بی کے اقدامات قابلِ تحسین ہیں اور دیگر رکن ممالک کیلئے عوامی خدمات میں ٹیکنالوجی کے استعمال کی بہترین مثال ہیں۔
وفد کے شرکا ءکا کہنا تھا کہ یہ دورہ پی آئی ٹی بی اور ای سی او رکن ممالک کے درمیان انفارمیشن ٹیکنالوجی کے شعبے میں ممکنہ تعاون اور تجربات کے تبادلے کیلئے بہت مفید ثابت ہوا ہے۔
