موٹر وے پولیس نے 5 روز قبل اغواء ہونے والے نوجوان کو بازیاب کرالیا
لاہور(ڈیلی پاکستان آن لائن) موٹروے پولیس نے 5 روز قبل اغواء ہونےو الے نوجوان کو بازیاب کروا کر ملزم اغوار کار کو گرفتار کرلیا، ملزم سے دستی بم، اسلحہ اور منشیات بھی برآمد ہوئی۔ ترجمان موٹر وے پولیس کے مطابق موٹروے پولیس ایم 3 کے پیٹرولنگ افسران نے ننکانہ صاحب کے نزدیک مشتبہ کار کو روکا تو کارسوار نے پولیس پر فائرنگ کردی اور فرارہونے کی کوشش کی۔
فائرنگ کے باوجود موٹروےپولیس نے ملزمان کا تعاقب جاری رکھا، اور گاڑی کو روک کر ایک ملزم کو گرفتار اور ایک مغوی کو بازیاب کرلیا، ملزم سے2 دستی بم، اسلحہ اور آئس بھی برآمد کی گئی۔ ترجمان موٹروے پولیس کے مطابق مغوی کو 5 روز قبل لاہور سے تاوان کے لیے اغواء کیا گیا تھا جس کی ایف آئی آر بھی درج ہے۔ ملزم کو اسلحہ، منشیات اور گاڑی سمیت مزید تفتیش کے لیے مقامی پولیس کے حوالے کردیا گیا ہے۔
ترجمان کے مطابق ایڈیشنل آئی جی علی احمد صابر کیانی اور ڈی آئی جی سید فرید علی نے پیٹرولنگ افسران کو مغوی کی بازیابی پر سراہا ہے۔
