کراچی: ٹریفک قوانین کی خلاف ورزیاں،سزائیں اور بھاری جرمانوں کی تجاویزسامنے آگئیں

کراچی (ڈیلی پاکستان آن لائن )کراچی میں ٹریفک قوانین کی خلاف ورزیوں پر سزائیں اور جرمانے بڑھانے کی تجاویز سامنے آگئیں۔
نجی ٹی وی جیو نیوز کے مطابق چیف سیکرٹری سندھ آصف حیدر شاہ کی زیر صدارت ٹریفک قوانین میں اصلاحات سے متعلق اجلاس ہوا جس میں آئی جی سندھ غلام نبی میمن،کمشنرکراچی سید حسن نقوی سمیت متعلقہ حکام شریک ہوئے۔
اجلاس میں ڈی آئی جی ٹریفک اور سیکرٹری ٹرانسپورٹ نے موٹر وہیکل آرڈیننس 1965میں مجوزہ ترامیم پر بریفنگ دیتے ہوئے بتایا کہ قوانین کی خلاف ورزی پرموٹر بائیک سے لے کر ہیوی ٹرانسپورٹ کے لئے بھاری جرمانے کی تجویز ہے جبکہ فیس لیس ٹکٹس سسٹم کی تجویز ہے جو خودکار نمبر پلیٹ کی شناخت اور سپیڈ کیمروں سے جرمانے جاری کرے گا۔
اجلاس میں بتایا گیا کہ تمام نئے ڈرائیورز کے لئے ڈرائیونگ کورس لازمی کرنے کی ترمیم کی بھی تجویز ہے جبکہ گاڑیوں کی رجسٹریشن کی مدت6 ماہ سے کم کرکے ایک ماہ کرنے کی تجویز دی گئی ہے۔
بریفنگ میں بتایا گیا کہ تمام کمرشل گاڑیوں میں ٹریکنگ اور سیفٹی ڈیوائسز کی تنصیب کی بھی تجویز ہے، صوبے میں چلنے والی تمام کمرشل گاڑیوں میں ڈیش کیم اور کیبن کیمرا لگانے کی بھی سفارش کی گئی ہے۔
اجلاس میں ٹریفک انجینئرنگ بیورو میں اصلاحات کے لئے چیف سیکرٹری نے فنڈز فراہم کرنے کی یقین دہانی بھی کرائی۔
چیف سیکرٹری سندھ نے کہا کہ ٹریفک قوانین کی خلاف ورزیوں پر سزائیں اور جرمانے بڑھائے جائیں گے۔چیف سیکرٹری نے پولیس اور محکمہ ٹرانسپورٹ کو ٹریفک قوانین پر سختی سے عملدرآمد کی ہدایت کرتے ہوئے کہا کہ نئے ٹریفک قوانین اور جرمانوں کے بارے میں عوامی آگاہی مہم شروع کی جائے۔