دیوینکا تریپاٹھی اور وویک دہیا کی طلاق کی افواہیں، اداکار نے صورتحال واضح کردی

ممبئی (ڈیلی پاکستان آن لائن) بھارتی ٹی وی کی مشہور جوڑی دیوینکا تریپاٹھی اور وویک دہیا کی طلاق کی خبریں سوشل میڈیا پر گردش کر رہی تھیں، جن پر اب وویک دہیا نے خاموشی توڑ دی ہے۔ حال ہی میں ایک تقریب کے دوران انہوں نے واضح کیا کہ یہ سب صرف افواہیں ہیں اور ان کا حقیقت سے کوئی تعلق نہیں۔

نیوز 18 کے مطابق وویک دہیا نے کہا کہ وہ اور دیوینکا ان خبروں پر صرف ہنستے ہیں۔ ایک ویڈیو میں انہوں نے مزاحیہ انداز میں کہا کہ وہ آئس کریم کھاتے ہوئے ان افواہوں پر ہنس رہے تھے اور سوچا کہ اگر یہ مزید چلی تو پاپ کارن بھی منگوا لیتے ہیں۔وویک نے مزید کہا کہ چونکہ وہ خود یوٹیوب بلاگر ہیں، اس لیے انہیں بخوبی علم ہے کہ کلک بیٹ کی دنیا کیا ہوتی ہے۔ ان کے مطابق سنسنی خیز سرخیاں لوگوں کو متوجہ کرنے کے لیے استعمال کی جاتی ہیں، لیکن حقیقت کچھ اور ہی ہوتی ہے، اور ایسی غیر حقیقی باتوں کو فروغ نہیں دینا چاہیے۔

یاد رہے کہ دیوینکا اور وویک کی ملاقات ٹی وی ڈرامہ "یہ ہے محبتیں" کے سیٹ پر ہوئی تھی اور دونوں نے 8 جولائی 2016 کو شادی کی تھی۔ دونوں کو مختلف شوز میں بھی ایک ساتھ دیکھا جا چکا ہے، جن میں مشہور ڈانس ریئلٹی شو "نچ بلیے 8" شامل ہے، جس کا فاتح یہ جوڑا رہا تھا۔