سندھ میں زائرین کی 2 بسوں کو حادثات، 16 افراد جاں بحق،درجنوں زخمی
نوابشاہ، خیر پور (ڈیلی پاکستان آن لائن )نوابشاہ اور خیر پور میں زائرین کی 2 بسوں کو پیش آنے والے حادثات میں کم از کم 16 افراد جاں بحق اور درجنوں زخمی ہو گئے۔
نجی ٹی وی" جیو نیوز" نے پولیس کے حوالے سے بتایا کہ نوابشاہ میں آمری روڈ پر فتوحل زرداری گاؤں کے قریب زائرین کی وین اور ٹرالر میں ٹکر ہوئی جس کے نتیجے میں 6 افراد جاں بحق اور 10 افراد زخمی ہوئے۔
پولیس کا کہنا ہے کہ حادثے میں زخمی ہونے والے افراد کو ہسپتال منتقل کر دیا گیا ہے، زائرین حضرت لعل شہباز قلندرؒ کے عرس میں شرکت کے لیے آرہے تھے۔
ادھر خیر پور میں بھی قومی شاہراہ پر رانی پور کے قریب زائرین کو لے جانے والی کوچ الٹ گئی جس کے نتیجے میں 10 افراد جاں بحق اور 30 زخمی ہو گئے۔
ریسکیو ذرائع کا بتانا ہے کہ حادثے میں زخمی ہونے والے 7 افراد کی حالت تشویشناک ہے، حادثے کا شکار مسافر کوچ پنجاب سے سیہون جا رہی تھی۔
