سوات:بحرین اسریت خوڑ میں پانی کے بہاؤ سے سڑک کو نقصان ، ٹریفک کی روانی متاثر
سوات ( ڈیلی پاکستان آن لائن ) حالیہ مون سون بارشوں کے باعث اسریت خوڑ میں پانی کا بہاؤ بہت زیادہ ہو نے کی وجہ سے خوڑ کا کنارہ ٹوٹ گیا اور پانی سڑک پر آ گیا۔ اس سے نیشنل ہائی وے کے سڑک کو نقصان پہنچا اور کچھ دیر کے لیے ٹریفک کی روانی متاثر ہوئی۔
اسسٹنٹ کمشنر بحرین جنید آفتاب نے موقع پر جا کر صورتحال کا جائزہ لیا اور متعلقہ اداروں کو فوری اقدامات کی ہدایت کی جس پر نیشنل ہائی وے اتھارٹی کی مشینری موقع پر پہنچ گئی اور خوڑ کی صفائی اور مذکورہ مقام کی مرمت کا کام شروع کر دیا گیا۔
اب سڑک پر ٹریفک معمول کے مطابق چل رہی ہے، جبکہ مزید صفائی اور بہتری کا کام جاری ہے تاکہ لوگوں کو دوبارہ کسی مشکل کا سامنا نہ ہو۔
ضلعی انتظامیہ کی جانب سے مون سون کے دوران تمام علاقوں میں صورتحال پر نظر رکھی جا رہی ہے تاکہ کسی بھی ایمرجنسی کی صورت میں فوری کارروائی کی جا سکے۔
