حکومت خواتین کیلیے محفوظ اور مساوی مواقع یقینی بنانے کیلیے پرعزم ہے:حنا پرویز بٹ کا سیمینار سے خطاب

لاہور ( ڈیلی پاکستان آن لائن ) پنجاب ویمن پروٹیکشن اتھارٹی، یونیورسٹی آف دی پنجاب کے ڈیپارٹمنٹ آف جینڈر سٹڈیز اور پیس اینڈ جسٹس نیٹ ورک کے تعاون سے خواتین اور بچیوں کے حقوق، برابری اور خودمختاری کے لیے اقدامات کو تیز کرنے کے عنوان سے سیمینار  ہوا۔  
تقریب میں ماہرین، پالیسی سازوں اور نوجوان قائدین نے خواتین کے تحفظ اور مساوی حقوق کے فروغ پر گفتگو کی۔ چیئرپرسن پنجاب ویمن پروٹیکشن اتھارٹی، حنا پرویز بٹ نے وزیر اعلیٰ پنجاب مریم نواز کی قیادت میں خواتین کے تحفظ کے اقدامات کو اجاگر کیا۔  
انہوں نے ویمن سیفٹی ونگ پنجاب کے تحت اقدامات پر روشنی ڈالی، جن میں ویمن سیفٹی موبائل ایپ، ایمرجنسی پینک بٹن، 15 ہیلپ لائن، ویمن پولیس اسٹیشنز اور عوامی آگاہی مہمات شامل ہیں۔ ان کا کہنا تھا کہ حکومت خواتین کے لیے محفوظ اور مساوی مواقع یقینی بنانے کے لیے پرعزم ہے۔  
دیگر مقررین میں پروفیسر ڈاکٹر رعنا ملک، عرفان مفتی، تنویر احان، ثمر رائے، کلثوم سقیب اور سمیعہ یوسف شامل تھے۔ مقررین نے خواتین کے حقوق کے فروغ اور صنفی امتیاز کے خاتمے پر زور دیا۔