میئر کراچی مرتضیٰ وہاب نے عیسیٰ نگری میں پانی اور سیوریج کے کام کا جائزہ لیا

کراچی (ڈیلی پاکستان آن لائن)میئر کراچی مرتضیٰ وہاب نے پانی اور سیوریج کی بحالی کی جاری کوششوں کا جائزہ لینے کے لیے کراچی کی سب سے پسماندہ کچی آبادیوں میں سے ایک عیسیٰ نگری کا دورہ کیا۔ یہ دورہ شہر کے مکینوں کی زندگیوں کو بہتر بنانے کے مشن میں ایک اہم سنگ میل کی نشاندہی کرتا ہے، خاص طور پر ان کمیونٹیز میں جو طویل عرصے سے ناکافی انفراسٹرکچر کے ساتھ جدوجہد کر رہی ہیں۔

کراچی واٹر اینڈ سیوریج سروسز امپروومنٹ پراجیکٹ (KWSSIP) کی طرف سے عیسیٰ نگری میں پانی اور سیوریج کے بنیادی ڈھانچے کی بہتری کا کام کیا جا رہا ہے تاکہ پانی، صفائی اور حفظان صحت کے مسائل سے دوچار رہائشیوں کو درپیش شدید چیلنجوں سے نمٹا جا سکے۔

مقامی حکومتی اہلکار، نیشنل رورل سپورٹ پروگرام (NRSP)، NESPAK، کمیونٹی لیڈرز، مخیر حضرات، کارکنان، صحافی، اور علاقہ مکینوں کی بڑی تعداد تقریب کا حصہ بننے کے لیے پنڈال میں موجود تھی۔

KWSSIP میں کچی آبادی پروگرام کی ٹیم لیڈر حمیدہ کلیم نے میئر کراچی کو پراجیکٹ کی پیش رفت کے بارے میں پریزنٹیشن دی۔ ان کے ہمراہ پروجیکٹ ڈائریکٹر KWSSIP عثمان معظم اور یوسی چیئرپرسن صنم بلوچ بھی تھیں۔

میئر وہاب نے مشترکہ کوششوں کو سراہتے ہوئے کہا، "ہم عیسیٰ نگری میں ایک ماڈل سیوریج سسٹم تیار کرنے کے لیے پرعزم ہیں۔ تمام اسٹیک ہولڈرز بامعنی تبدیلی لانے کے لیے سچے ارادوں کے ساتھ کام کر رہے ہیں۔

" انہوں نے مزید کہا کہ سندھ حکومت کی توجہ رنگ و نسل کی حدود سے بالاتر ہو کر انسانیت کی خدمت پر مرکوز ہے۔ "عیسیٰ نگری مختلف مذہبی پس منظر سے تعلق رکھنے والے لوگوں کا گھر ہے، اور یہاں ہمارا کام انسانیت پر ہمارے یقین کی عکاسی کرتا ہے۔ پاکستان پیپلز پارٹی ایک گلدستے کی مانند ہے جہاں ہر پھول اپنی خوشبو پھیلاتا ہے، جو شمولیت کے لیے ہمارے عزم کی علامت ہے۔"