جعلی ویزوں پر برطانیہ سیٹل ہونے کی کوشش،25 طلباء کو جیل بھیجنے کا حکم

اسلام آباد(ڈیلی پاکستان آن لائن )عدالت نے جعلی ویزوں پر برطانیہ سیٹل ہونے کی کوشش کرنے والے 25 طلباء کو جیل بھیجنے کا حکم دے دیا۔
نجی ٹی وی" ایکسپریس نیوز" کے مطابق ڈسٹرکٹ اینڈ سیشن کورٹس اسلام آباد میں جعلی ویزوں پر برطانیہ سیٹل ہونے کی کوشش میں گرفتار طلباء کے کیس کی سماعت ہوئی، جس میں عدالت نے ایف آئی اے کی 25 طلباء کے مزید جسمانی ریمانڈ کی استدعا مسترد کرتے ہوئے تمام ملزمان کو 14 دن کے جوڈیشل ریمانڈ پر جیل بھیجنے کا حکم دے دیا۔
ملزمان کو جوڈیشل مجسٹریٹ احمد شہزاد گوندل کی عدالت میں پیش کیا گیا۔عدالت کو بتایا گیا کہ ملزمان پر پاسپورٹ ٹیمپرڈ کرکے برطانیہ جانے اور وہاں سیٹل ہونے کی کوششوں کا الزام ہے۔دوران سماعت ملزمان کی جانب سے ضمانت بعد از گرفتاری کی درخواستیں دائر کی گئی۔
عدالت نے فریقین کو نوٹس کرتے ہوئے سماعت 24 مارچ تک ملتوی کردی اور اگلی سماعت پر وکلاء کی جانب سے دلائل طلب کرلیے۔