اربوں روپے کی خوردربرد ناقابل معافی جرم، عمران خان کا حساب دینا پڑے گا: مسلم لیگ (ن)
اسلام آباد (مانیٹرنگ ڈیسک) مسلم لیگ(ن) کے سیکرٹری جنرل احسن اقبال نے کہا ہے کہ اربوں کی خورد برد ناقابل معافی جرم، حکومت سوچی سمجھی سازش کے ذریعے الیکشن کمیشن کو کام سے روکتی رہی، اگر سب ٹھیک ہے تو پھر رازداری کس بات کی ہے؟۔مسلم لیگ (ن) کے رہنما چودھری احسن اقبال نے پریس کانفرنس کرتے ہوئے الزام عائد کیا کہ تحریک انصاف نے الیکشن کمیشن کے سامنے اپنے 23 اکاؤنٹ ڈکلیئر نہیں کیے۔ قوم عمران خان سے ان کا حساب مانگ رہی ہے۔ بے نامی اکاؤنٹ پر خان صاحب قوم کو کیا جواب دیں گے؟ قوم کو بتایا جائے بھارت، امریکا اور مشرق وسطیٰ میں کس کس نے فنڈنگ کی؟ قوم جاننا چاہتی ہے کہ 23 اکاؤنٹ کیوں چھپائے گئے؟ نئے پاکستان کے نام پر اوورسیز پاکستانیوں سے لئے گئے چندے کو کیسے استعمال کیا گیا؟احسن اقبال نے کہا کہ اربوں روپے کی خورد برد ناقابل معافی جرم ہے۔ عمران خان کو اس کا حساب دینا پڑے گا۔ تحریک انصاف کے پرائیویٹ اکاؤنٹ میں ملین ڈالر کی ترسیلات ہوئی ہیں لیکن عدالت میں جا کر کہتے ہیں کہ ان اکاؤنٹ کی کسی قسم کی میڈیا کوریج نہیں ہونی چاہیے۔ تمام اکاؤنٹ ٹھیک ہیں تو سماعت کو خفیہ رکھنے کے لیے درخواست کیوں دیتے ہیں؟انہوں نے الزام عائد کیا کہ تحریک انصاف الیکشن کمیشن کو نامکمل کرکے مواخذے سے بچنا چاہتی ہے۔ پی ٹی آئی نے الیکشن کمیشن پر مختلف قانونی ہتھکنڈوں کے ذریعے اثر انداز ہونے کی کوشش کی اور سازش کے ذریعے اسے آزادانہ کام کرنے سے روکتی رہی۔ گزشتہ پانچ برسوں سے فارن فنڈنگ کا کیس چل رہا ہے لیکن اسے مختلف حیلے بہانوں سے التوا میں رکھا گیا۔
مسلم لیگ ن
 ){kind=link}