بہاولپور ڈویژنل ٹینس چیمپئن شپ کا 25 ستمبر سے آغاز
بہاولپور(ڈیلی پاکستان آن لائن)بہاولپور ڈویژنل (انٹر کلبز) لان ٹینس چیمپئن شپ 2024 کا انعقاد 25 سے 28 ستمبر تک بہاول جمخانہ، بہاولپور میں ہوگا۔
ٹینس بہاولپور ڈویژن کے صدر، زوہیب رضا نے اعلان کیا ہے کہ یہ ایونٹ پنجاب لان ٹینس ایسوسی ایشن (PLTA) کے صدر کیپٹن (ر) فضیل اصغر کے ویژن کے تحت منعقد کیا جا رہا ہے۔
انہوں نے کہا، "کیپٹن فضیل اصغر پنجاب بھر میں ٹینس کو فروغ دینے کے لیے پرعزم ہیں اور ایسے ایونٹس کے انعقاد کے لیے ایک متحرک قوت رہے ہیں۔ ان کا ویژن ہے کہ ٹینس کو صوبے کے ہر کونے تک پہنچایا جائے تاکہ نوجوان ٹیلنٹ کو ابھرنے کا موقع ملے اور وہ مستقبل میں پاکستان کی نمائندگی کر سکیں۔"
صدر بہاولپور ڈویژن نے مقامی انتظامیہ خصوصی طور پر کمشنر بہاولپور نادر چٹھہ، صدر بہاول جمخانہ اور ڈپٹی کمشنر بہاولپور ظہیر انور جپہ، سیکریٹری ڈاکٹر اویس اے نظامی، کنوینر اسپورٹس کمیٹی سردار عامر بلوچ اور ڈویژنل اسپورٹس آفیسر عامر حمید کا چیمپئن شپ کے انعقاد میں بھرپور تعاون پر شکریہ ادا کیا۔ اور کہا کہ ان کی اجتماعی کاوشوں اور کھیل کے لیے عزم نے اس معزز ایونٹ کو بہاولپور میں منعقد کرنا ممکن بنایا ہے۔انہوں نے اس تقریب کے انعقاد میں مکمل حمایت پر اسپورٹس بورڈ پنجاب کا بھی شکریہ ادا کیا۔
زوہیب رضا نے کارپوریٹ سپانسرز کی اہم شراکت کو بھی اجاگر کیا، خاص طور پر ایشیا گھی ملز کے مالک چودھری سعد مسعود اور حق برادران کے مالک احسان علی حق کا ذکر شکریہ ادا کیا۔ اور کہا کہ ہم سعد مسعود اور احسان علی حق کے بے حد مشکور ہیں جن کی فراخدلانہ سپانسرشپ نے اس چیمپئن شپ کو ممکن بنایا۔ ایسی سپانسرشپس کی مدد سے ہم امید کرتے ہیں کہ بہاولپور میں مزید ٹینس ٹورنامنٹس کا انعقاد جاری رکھیں گے، نوجوانوں کو صحت مند کھیلوں کی سرگرمیوں میں شامل کریں گے۔ یہ نہ صرف مستقبل کے چیمپئنز پیدا کرنے میں مدد گار ثابت ہوگا بلکہ قومی اور بین الاقوامی سطح پر بہاولپور کی حیثیت کو ایک ٹینس حب کے طور پر مضبوط کرنے میں بھی اہم کردار ادا کرے گا۔
