نوشہرہ، مسجد کے لاﺅڈ  سپیکر کے غلط استعمال، پولیس کو دھمکیاں دینے پر شہری کیخلاف پیکا کے تحت مقدمہ درج

نوشہرہ(آئی این پی)نوشہرہ کے تھانہ اکوڑہ خٹک پولیس نے شہری کیخلاف مسجد کے لاﺅڈ اسپیکر کے غلط استعمال، اسٹیشن ہاوس آفیسر (ایس ایچ او)کو دھمکیاں دینے پر دی پریونشن آف الیکٹرانک کرائم ایکٹ (پیکا)کے تحت مقدمہ درج کر لیا۔

رپورٹ کے مطابق نوشہرہ پولیس کی جانب سے کہا گیا ہے کہ سوشل میڈیا پر وائرل ایک ویڈیو میں دیکھا جاسکتا ہے کہ خاد علی  نامی منشیات فروش مسجد ابوبکر گاوں سوڑیا خیل میں لاڈ اسپیکر پر اکوڑہ پولیس کو دھمکیاں دے رہا ہے۔پولیس کے مطابق ملزم منشیات فروش ہے، اور خود بھی آئس کے نشے کا عادی ہے، جرائم پیشہ اور ریکارڈ یافتہ ہے، ضلع کے مختلف تھانوں میں اس کیخلاف مقدمات درج ہیں۔

ملزم کے خلاف مقدمہ نمبر 308 سال 2019، مقدمہ نمبر 426 سال 2022، مقدمہ نمبر 279 سال 2024 بجرم 302,34، مقدمہ نمبر 517 سال 2025، مقدمہ 521 سال 2025 بجرم دفعہ 21 ,04 ,3/4 لاوڈ اسپیکر ایکٹ اور دیگر دفعات کے تحت درج ہیں۔پولیس حکام کا کہنا ہے کہ ملزم کی گرفتاری کے لیے چھاپہ مار ٹیمیں تشکیل دیکر ٹھکانوں پر چھاپے مارے جارہے ہیں، ملزم کی گرفتاری جلد متوقع ہے۔