انٹیل کا اپنے  20 فیصد سے زائد ملازمین  کو فارغ کرنے کا فیصلہ

واشنگٹن (ڈیلی پاکستان آن لائن) کمپیوٹر ہارڈویئر بنانے والی کمپنی  انٹیل  اپنے ملازمین میں سے 20 فیصد سے زائد افراد کو فارغ کرنے کا منصوبہ بنا رہی  ہے۔ یہ فیصلہ کمپنی میں بیوروکریسی کم کرنے اور انتظامی ڈھانچے کو سادہ بنانے کے مقصد کے تحت کیا جا رہا ہے۔ انٹیل کے اس وقت  ایک لاکھ آٹھ ہزار 900  ملازمین ہیں، جو گزشتہ سال  ایک لاکھ 24 ہزار 800 تھے۔

گیجٹس 360 کے مطابق یہ کمپنی میں نئی قیادت کے تحت پہلا بڑا قدم ہے۔ لِپ بو ٹین جنہوں نے گزشتہ ماہ انٹیل کے سی ای او کا عہدہ سنبھالا، اس اقدام کے ذریعے انٹیل کو دوبارہ ایک انجینئرنگ پر مبنی کمپنی بنانے کی کوشش کر رہے ہیں۔ کمپنی پہلے ہی گزشتہ سال  15 ہزار ملازمین فارغ کر چکی ہے۔

انٹیل حالیہ برسوں میں اپنی ٹیکنالوجی برتری کھو چکی ہے اور مصنوعی ذہانت کے میدان میں این وڈیا جیسے حریفوں سے پیچھے رہ گئی ہے۔ اس کی وجہ سے کمپنی کو مسلسل تین سال سے فروخت میں کمی اور مالی نقصان کا سامنا ہے۔

نئے سی ای او ٹین نے اعلان کیا ہے کہ وہ انٹیل کے غیر اہم شعبہ جات کو فروخت کرنے اور کمپنی کی توجہ صرف بنیادی مصنوعات پر مرکوز رکھنے کا ارادہ رکھتے ہیں۔ اس سلسلے میں انٹیل نے حال ہی میں اپنے پروگرام ایبل چِپس یونٹ 'الٹیرا' کا 51 فیصد حصہ "سلور لیک مینجمنٹ" کو فروخت کر دیا ہے۔