کراچی، ایل پی جی کی دکان میں آتشزدگی کے باعث 2 افراد جاں بحق

کراچی (ڈیلی پاکستان آن لائن) فیڈرل بی ایریا صغیر سینٹر میں ایل پی جی کی دکان میں آگ لگنے سے 2 افراد جھلس کر جاں بحق ہوگئے۔

ایکسپریس نیوز کے مطابق بلاک 16 صغیر سینٹر میں قائم ایل پی جی گیس سلنڈر کی دکان میں آگ بھڑک اٹھی جس نے دیکھتے ہی دیکھتے شدت اختیار کرلی، عینی شاہدین کا کہنا ہے کہ آگ لگنے کے بعد گیس سلنڈر پھٹنے کی بھی آوازیں سنائی دیں۔ایل پی جی دکان کے برابر میں قائم ہوٹل پر موجود افراد بھی جان بچانے کیلئے بھاگے اور جائے وقوعہ کے اطراف میں خوف و ہراس پھیل گیا۔ایل پی جی کی دکان میں آگ لگنے کے دوران گلشن اقبال سے سہراب گوٹھ جانے والے راشد منہاس روڈ پر ٹریفک کی روانی شدید متاثر ہونے سے گاڑیوں کی قطاریں لگ گئیں ، آتشزدگی کی اطلاع پر کے ایم سی فائر بریگیڈ اور ریسکیو 1122 کا عملہ موقع پر پہنچ گیا اور سخت جدوجہد کے بعد آگ پر قابو پانے کے بعد کولنگ کا عمل شروع کر کے دکان کی سرچنگ کی۔ تلاشی کے دوران دکان سے دو افراد کی جھلسی ہوئی لاشیں برآمد ہوئیں جنہیں ضابطے کی کارروائی کیلئے عباسی شہید ہسپتال منتقل کردیا گیا ہے۔