احتجاج کرنا ہر شہری کا حق، لیکن کوئی ہمیں بلیک میل نہیں کر سکتا،وزیراعلیٰ بلوچستان سرفراز بگٹی
کوئٹہ(ڈیلی پاکستان آن لائن) وزیراعلیٰ بلوچستان میر سرفراز بگٹی کا کہنا ہے احتجاج کرنا ہر شہری کا حق ہے لیکن کوئی ہمیں بلیک میل نہیں کر سکتا۔
تقریب سے خطاب کرتے ہوئے سرفراز بگٹی نے کہا کہ کسی کے ہاتھوں بلیک میل نہیں ہوں گا، محکموں میں اصلاحات کا سلسلہ جاری رکھیں گے، جن کو ریفارمز سے کوئی مسئلہ ہے تو ان کے ساتھ بیٹھنے کیلئے تیار ہیں۔ہسپتالوں سے کرپشن ختم کر رہے ہیں، ڈاکٹروں کے مسائل بھی دور کریں گے۔بلوچستان کے ساتھ کھڑا ہوں، میرے لیے بلوچستان کے لوگ اہم ہیں، بلوچستان میں عوام کی فلاح وبہبود کیلئے بھرپور اقدامات کیے جا رہے ہیں۔
وزیراعلیٰ بلوچستان نے کہا کہ 200ارب روپے کے ترقیاتی بجٹ سے پاکستان کے تینتالیس فیصد رقبے پر مشتمل صوبے کی ترقی ایک مشکل اور صبر آزما عمل ہے۔ وہ یورپی یونین کے تعاون سے منعقدہ ایک سیمینار سے خطاب کر رہے تھے جس کا اہتمام پاکستان پریس فاؤنڈیشن اور بین الاقوامی تجارتی مرکز نے کیا تھا۔انہوں نے کہا بلوچستان میں ترقی کا عمل عالمی ترقیاتی شراکت داروں اور وفاقی حکومت کی مکمل معاونت کے بغیر ممکن نہیں۔ صوبے میں پہلا خواتین کی معاشی خودمختاری اور ماحولیاتی تبدیلیوں سے نمٹنے کے لیے وقف مالیاتی فنڈ قائم کر دیا گیا ہے، جو ایک بڑی پیش رفت ہے۔
وزیراعلیٰ بلوچستان نے اعتراف کیا کہ ماضی میں ناقص حکمرانی اور بدعنوانی کی وجہ سے نوجوانوں کا ریاست سے فاصلہ بڑھا، جس کے باعث احساسِ محرومی نے جنم لیا۔ تاہم اب حکومت کی کوشش ہے کہ نوجوانوں کو بہتر طرزِ حکمرانی، شفافیت اور مکالمے کے ذریعے دوبارہ ریاست کے قریب لایا جائے۔
وزیر اعلیٰ بلوچستان میر سرفراز بگٹی کا یورپی یونین کے تعاون سے پی پی ایف اور آئی ٹی سی کے زیر اہتمام سیمینار سے خطاب
— Govt. of Balochistan (@dpr_gob) August 28, 2025
وزیر اعلیٰ بلوچستان میر سرفراز بگٹی نے کہا کہ دو سو ارب روپے کے ترقیاتی بجٹ سے پاکستان کے 43 فیصد رقبے کی ترقی ایک مشکل عمل ہے، بلوچستان میں عالمی ڈویلپمنٹ… pic.twitter.com/9223crONBO
