پنجاب اسمبلی میں اپوزیشن کی ہنگامہ آرائی: شور شرابا ،شدید نعرے بازی،ضمنی بجٹ کی منظوری مؤخر

لاہور(ڈیلی پاکستان آن لائن )پنجاب اسمبلی میں اپوزیشن کے شور شرابے اور ہنگامہ آرائی کے باعث ضمنی بجٹ کی منظوری نہ ہوسکی۔
پنجاب اسمبلی میں وزیراعلیٰ پنجاب مریم نواز کی تقریر کے دوران اپوزیشن اراکین نے شور شرابا کیا اور شدید نعرے بازی کی جبکہ ضمنی بجٹ کی منظوری کے موقع پر بھی اپوزیشن اراکین نے ہنگامہ آرائی کی۔سپیکر پنجاب اسمبلی نے اپوزیشن کی ہنگامہ آرائی کے باعث ضمنی بجٹ کی منظوری کا عمل مؤخر کردیا اور کہا کہ میں نے ہاؤس کو بہتر انداز سے چلانے کی کوشش کی، آئندہ ہاؤس کو ان آرڈر چلانے کے لئے اپنا آئینی اختیار استعمال کروں گا۔سپیکر ملک محمد احمد خان نے پنجاب اسمبلی کا اجلاس کل دوپہر 2 بجے تک ملتوی کردیا۔

دوسری جانب وزیراطلاعات پنجاب عظمیٰ بخاری نے میڈیا سے گفتگو کرتے ہوئے کہا کہ ہم بھی اپوزیشن میں رہے لیکن ان جیسی بدتمیزی نہیں کی، ہمارے ساتھ یہ جتنا برا سلوک کرسکتے ہیں، انہوں نے کیا، وزیراعلیٰ کے خطاب کے دوران جو کچھ ہوا قابل افسوس ہے۔ اپوزیشن کو تمام مراعات دی جارہی ہیں، ہم نے بے ضرر وزیراعلیٰ بزدار کے دور میں بھی بدتمیزی نہیں کی، اپوزیشن جیسا کرے گی اب ان کو ویسا ہی جواب دیا جائےگا، فیصلہ کیا ہے آئندہ اپوزیشن رکن کی تقریر نہیں سنی جائے گی۔