پشاور میں نوجوان کے قتل کا معمہ پولیس نے تین دن میں حل کر لیا

پشاور(آئی این پی ) ایس پی صدر ڈویژن ملک حبیب خان کی ہدایات پر ڈی ایس پی بڈھ بیر سرکل ظفر خان کی نگرانی میں ایس ایچ او تھانہ بڈھ بیر رفیق خان نے تفتیشی افسران کے ہمراہ اہم کارروائی کے دوران تین دن کے اندر اندر نوجوان کےقتل کا معمہ حل کر لیا۔

 مقتول حامد اللہ کے قتل میں اس کا بھائی ہی ملوث نکلا، ملزم زاہد اللہ نے بھائی پر فائرنگ کرکے قتل کردیا تھا، دوران تفتیش مقتول کے بھائی زاہد اللہ کے متضاد بیانات کو مدنظر رکھتے ہوئے مزید انٹاروگیٹ کرنے کا فیصلہ کیا گیا، جس نے اصل حقائق سے پردہ چاک کرتے ہوئے اپنے بھائی کے اندھا قتل میں ملوث ہونے کا اعتراف کرلیا، ملزم کے مطابق مقتول آئس کی لت میں مبتلا تھا، جو ہر وقت گھر میں لڑائی جھگڑے کرتا تھا، جس کے قبضے سے اسلحہ آلہ قتل بھی برآمد کرلیا گیا ہے، ملزم سے مزید تفتیش جاری ہے۔

 تفصیلات کے مطابق مورخہ 26 جنوری کو مدعی شفیع اللہ نے تھانہ بڈھ بیر پولیس کو اپنے چچا زاد بھائی حامد اللہ کے قتل کی نامعلوم ملزم یا ملزمان کے خلاف رپورٹ کی تھی، جس پر قتل کا مقدمہ درج کرکے مختلف پہلوؤں پر جامع تفتیش شروع کردی گئی تھی ایس پی صدر ڈویژن ملک حبیب خان نے اندھا قتل کا سختی سے نوٹس لیتے ہوئے ملوث ملزم یا ملزمان کا سراغ لگانے اور گرفتاری کیلئے ڈی ایس پی بڈھ بیر سرکل ظفر خان، ایس ایچ او تھانہ بڈھ بیر رفیق خان اور تفتیشی افسران پر مشتمل خصوصی ٹیم تشکیل دے دی گئی خصوصی ٹیم نے جدید سائنسی خطوط اور ٹیکنیکل بنیادوں پر مختلف پہلوؤں پر جامع تفتیش کے دوران متعدد مشکوک افراد کو شامل تفتیش کیا گیا جبکہ قتل کے متعلق اصل حقائق جاننے اور ملوث ملزم یا ملزمان کو گرفتار کرنے کی خاطر گھر کے افراد، رشتہ داروں اور دیگر تعلق داروں کو شامل تفتیش کیا، مقتول حامد اللہ کے بھائی زاہد اللہ کو مزید انٹاروگیٹ کرنے کا فیصلہ کیا گیا، جس نے اصل حقائق سے پردہ چاک کرتے ہوئے اپنے بھائی کے قتل میں ملوث ہونے کا اعتراف کرلیا، ملزم کے مطابق مقتول آئس کی لت میں مبتلا تھا، جو ہر وقت گھر میں لڑائی جھگڑے کرتا تھا، ملزم کے قبضے سے اسلحہ آلہ قتل بھی برآمد کرلیا گیا ہے، جس سے مزید تفتیش جاری ہے